Búgin «Aq jol» demokratiialyq partiiasynyń kezekten tys XV quryltaiy Daniia Espaevany resmi túrde prezidenttikke úmitker retinde bekitti, dep habarlaidy "Ult aqparat".
Quryltai delegattary qupiia daýys berý arqyly óz tańdaýyn jasady. Buǵan deiin «Aq jol» partiiasynyń atynan 6 adam prezident sailaýyna qatysýǵa nietti bolǵan. 13 sáýirde «Aq jol» partiiasy Ortalyq keńesiniń plenýmy prezident sailaýyna úmitkerlerdi anyqtai almady.
Osy ýaqytqa deiin tórt adam - Óskemen qalalyq máslihatynyń depýtaty Qýat Rahymberdin, Taraz qalalyq máslihatynyń depýtaty Asan Qoshmambetov, Atyraý oblystyq filialynyń ókili Serik Erýbaev jáne SKO filialynyń tóraǵasy Evgenii Kintsel óz kandidatýrasyn usynǵan bolatyn.
Bertin kele olarǵa QR Parlament Májilisiniń depýtaty Daniia Espaeva men Qazaqstan Qurylysshylar odaǵynyń tóraǵasy Talǵat Erǵaliev qosyldy. Búgin barlyq úmitkerler ózderiniń beinebaianyn kórsetip, sailaýaldy ustanymdaryn jariialady. Sondai-aq, delegattardyń suraqtaryna jaýap berdi.
Al daýys berý kezinde 190 delegattyń 49,5 protsenti depýtat Daniia Espaevanyń kandidatýrasyn qoldady. Biraq kandidattyń daýysy 50 protsentten asýy kerek.
Osydan keiin prezidiým músheleri keńesip, ekinshi týrdy ótkizbeý jóninde sheshim qabyldady. Sebebi D.Espaevanyń basymdyǵy aiqyn boldy. Delegattar atalǵan sheshimdi qoldady. Sóitip, Daniia Espaeva partiianyń atynan prezident sailaýyna kandidat retinde bekitildi.
Espaeva Daniia Mádiqyzy 1961 jyly 5 naýryzda dúniege kelgen. Almaty qalasyndaǵy Qazaq memlekettik basqarý akademiiasyn (1993 j.) "ekonomist" mamandyǵy boiynsha bitirgen.
KSRO Memlekettik bankiniń Aqtóbe oblystyq departamentiniń nesie bólimi ekonomisi (1982-1986); KSRO Memlekettik bankiniń Aqtóbe oblystyq departamentiniń kredittik bóliminiń aǵa ekonomisi (1986-1987); Promstroibank óńirlik departamentiniń aqsha ainalymy bóliminiń bas ekonomisi (1988-1991); "Turan" ÓU Aqtóbe filialynyń bas býhgalteri (1992 j.); Aqtóbe filialy "Turan" filialynyń direktor orynbasary (1992-1995); Bas maman, bastyqtyń orynbasary, aǵa "Álem bankiniń" Aqtóbe oblystyq departamentiniń nesie bóliminiń bastyǵy (1995-1997); "BTA Banki" AQ Korporativtik biznesti damytý jónindegi direktordyń orynbasary (1998-2005); "BTA Banki" AQ Aqtóbe filialynyń direktory (2006-11.2014); "Qazkommertsbank" AQ Aqtóbe filialynyń direktory (11.2014-03.2016). "Atameken Odaǵy" Aqtóbe filialynyń basqarma múshesi; Aqtóbe oblysynyń óńirlik úilestirý keńesiniń múshesi boldy.
Aqtóbe oblystyq máslihatynyń depýtaty, otbasy jáne áielder komissiiasynyń múshesi (08.2008 j., 2012-2016 jj. Qaita sailanǵan), "Aq jol" partiiasy atynan parlament depýtattynyǵa úmitker (05.02.2016j.). Qazaqstan Respýblikasy marlamenti májilisiniń "Aq jol" partiiasynyń VI shaqyrylymy boiynsha depýtaty, Qazaqstan Respýblikasy parlamenti májilisiniń Qarjy jáne biýdjet komitetiniń múshesi (24.03.13j. bastap).
"Qurmet" ordenimen (2011 j.), Qazaqstan Respýblikasynyń Táýelsizdiginiń 20 jyldyǵy medalimen, "Úzdik qarjyger" medalimen marapattalǵan.
Turmysta, eki balanyń anasy.
