Qazaqstanda áleýmettik salyq kólemi tómendetilýi múmkin. Bul týraly búgin Májilistegi Úkimet saǵatynda elimizdiń Ulttyq ekonomika ministri Timýr Súleimenov málim etti, dep habarlaidy Ult.kz QazAqparat agenttigine silteme jasap.
Ministrdiń aitýynsha, 2010 jyldan beri elimizde salyq júktemesi birtindep tómendetilip keldi jáne qazirgi ýaqytta barynsha tómen bolyp otyr.
«5 paiyzdyq zeinetaqymen qamtamasyz etý, áleýmettik-meditsinalyq saqtandyrý tólemderi boiynsha qabyldanǵan sheshimderge bailanysty jalaqy qoryna júktemeniń arta túsetindigimen túbegeili kelisemin. Bul bizdi alańdatyp qana qoimai sonymen birge qordy qalai qysqartý kerektigin oilandyryp ta otyr. Ázirlenip jatqan Salyq kodeksi aiasynda biz salyq júktemesiniń qandai elementterin tómendetýge bolatyndyǵyn oilastyratyn bolamyz. Ázirshe, zeinetaqy júiesin, meditsinalyq qamsyzdandyrýdy qoǵamdyq qaita teńgerimdeýsiz tómendetýge bolatyn jalǵyz element - bul áleýmettik salyq bolyp tur. Ony tómendetýdi oilastyratyn shyǵarmyz», - dedi Súleimenov depýtattardyń osy máselege qatysty saýalyna orai.
Aita keteiik, «Salyq jáne biýdjetke tólenetin basqa da mindetti tólemder týraly (Salyq kodeksi)» Qazaqstan Respýblikasynyń 2008 jylǵy 10 jeltoqsandaǵy № 99-IV Kodeksiniń 355-babyna sáikes, jeke kásipkerler; jeke notariýstar, jeke sot oryndaýshylary, advokattar, eger osy baptyń 2-tarmaǵynda ózgeshe belgilenbese Qazaqstan Respýblikasynyń rezident zańdy tulǵalary, Qazaqstan Respýblikasynda qyzmetin turaqty mekemeler arqyly júzege asyratyn rezident emes zańdy tulǵalar, qosarlanǵan salyq salýdy boldyrmaý týraly halyqaralyq shartqa sáikes, turaqty mekeme qurýǵa ákep soqpaityn, filial nemese ókildik arqyly qyzmetin júzege asyratyn rezident emes zańdy tulǵalar áleýmettik salyq tóleýshiler bolyp tabylady.
