Álemdegi jáne elimizdegi pandemiia áserinen eki jyl qatarynan qashyqtan bilim alyp, onlain oqý júzege asyryldy. Osyǵan orai, QR Bilim jáne ǵylym vitse-ministri Sholpan Karinovanyń aitýynsha, aldaǵy oqý jylynda biryńǵai onlain bilim berý platformasy iske qosylady, - dep habarlaidy «Ult aqparat».
Búgin Ortalyq kommýnikatsiialar qyzmetinde vitse-ministr osy jobanyń qolǵa alynǵanyn atap ótti.
«Memleket basshysy Biryńǵai onlain bilim berý platformasyn qurý boiynsha tapsyrma bergen bolatyn. Bul baǵytta tiisti jumystar júrip jatyr. Jalpy, bul baǵyttaǵy qadamdar jańa oqý jylynyń basyna qarai aiaqtalady. Kelesi oqý jylynan bastap bilim uiymdary biryńǵai bilim berý portalyn paidalana alady», - dedi Sholpan Karinova Ortalyq kommýnikatsiialar qyzmetinde.
Aita keteiik, byltyr oqý jylynyń basynda Memleket basshysy Qasym-Jomart Toqaev Qazaqstan halqyna jyl saiynǵy dástúrli Joldaýynda biryńǵai onlain bilim platformasyn ázirleý kerektigin tapsyrǵan edi.
«Koronavirýs indetiniń saldarynan dúniejúzindegi mektep oqýshylary men stýdentterdiń basym kópshiligi qashyqtan oqýǵa kóshti. Bul jumystyń tásili men mazmunyn túbegeili ózgertýde. Qashyqtan oqytý isin uiymdastyrýda Úkimettiń jibergen qatelikterin jaqsy bilemiz. Ashyǵyn aitqanda, áli kúnge deiin naqty bir onlain platforma joq. Muǵalimder, oqýshylar jáne ata-analar kúndiz-túni «WhatsApp»-tan bas kótermeitin boldy. Tolyqqandy oqý úderisi úshin qajetti barlyq fýnktsiialary bar biryńǵai onlain bilim berý platformasyn shuǵyl ázirleý qajet», - degen bolatyn Prezident.
Sonymen qatar, Sholpan Karinova Bilim jáne ǵylym ministrligi uiymdastyratyn olimpiadalar oqýshylar úshin aqysyz negizde bolatynyn eske saldy. Onyń aitýynsha, balalardyń daryndylyǵyn qoldaý – ziiatkerlik olimpiadalar, jalpy bilim beretin pánder boiynsha ǵylymi jobalar, konkýrstar, kásibi sheberlik konkýrstary jáne sporttyq jarystar ótkizý arqyly birneshe baǵytta júzege asyrylady.
«Olimpiadalar men jarystardyń qorytyndylary boiynsha jeńimpazdar men júldegerlerge tiisti deńgeidegi diplomdar jáne barlyq qatysýshyǵa sertifikattar beriledi. Olar óte mańyzdy. Óitkeni daryndylyqty damytý, qoldaý, sondai-aq olardy yntalandyrý ár daryndy oqýshyny ary qarai jigerlendirýge áser etedi. Diplomdar men sertifikattardy berý de tegin túrde júrgiziledi», - dedi vitse-ministr.
Al aqyly bilim berý olimpiadalarynyń Bilim jáne ǵylym ministrligine qatysy joq.
«Qoǵamda kóp talqylanyp júrgen máselege toqtalyp ótpekpin. Bul óz kezeginde uiymdastyrylyp jatqan aqyly olimpiadalar men konkýrstarǵa qatysty. Qazirgi kezde qazaqstandyq bilim berý naryǵynda jekemenshik kásiporyndar men uiymdar da osy qyzmetterdi usynyp keledi. Olar túrli aqparat kózderi arqyly ata-analarǵa da, oqýshylarǵa da, muǵalimderge de, mektepterge de málimetterdi tolyqtai jetkizip turady. Bul qyzmet kórsetý salasy litsenziialanbaidy jáne ministrlik tarapynan resmi turǵyda ruqsat alýdy qarastyrmaityn qyzmet túri. Qazirgi kezdegi tájiribede osy konkýstardyń barlyǵy aqyly túrde ótkizilip jatyr. Olarǵa qatysý úshin ata-analar óz qarajatyn salady», - dedi Sholpan Karinova.
Esterińizge sala keteiik, koronavirýs indetiniń saldarynan dúniejúzindegi mektep oqýshylary men stýdentterdiń basym kópshiligi qashyqtan oqýǵa kóshkendikten Memleket basshysy Qasym-Jomart Toqaev Qazaqstan halqyna jyl saiynǵy dástúrli Joldaýynda biryńǵai onlain bilim platformasyn ázirleý kerektigin tapsyrǵan edi. Búgin Ortalyq kommýnikatsiialar qyzmetinde vitse-ministr osy jobanyń qolǵa alynǵanyn atap ótti. QR Bilim jáne ǵylym vitse-ministri Sholpan Karinovanyń aitýynsha, aldaǵy oqý jylynda biryńǵai onlain bilim berý platformasy iske qosylady.
