Elimizde 93 myńǵa jýyq stýdent jataqhanadan oryn ala almai júr. Bul týraly búgin «Nur Otan» partiiasy janyndaǵy «Jas Otan» jastar qanatynyń jetekshisi Elnur Beisenbaev málim etti, dep habarlaidy "Ult aqparat".
«Qańtar aiynyń sońynan bastap aqpan aiynyń ortasyna deiin jataqhanalardy tekserdik. Basty maqsatymyz jataqhanalardaǵy jaǵdaidy bilý boldy. Qazirgi ýaqytta respýblikada 645 jataqhana bolsa, sonyń 270-in tekserdik. Al 375 jataqhana tekserilip jatyr. Birden aita ketý kerek, tekserilgen barlyq jataqhana jaǵdaiy ortasha nemese tómen», - dedi ol.
Elnur Beisenbaevtyń dereginshe, atalǵan sharaǵa basqa jataqhanalarda turatyn 2 myńnan astam stýdent, sonymen qatar «Jas Otan» jastar qanatynyń belsendileri qatysty.
«Elimizdegi 645 jataqhanada qazirgi ýaqytta 169 myń stýdent, onyń ishinde 90 myńy joǵary oqý oryndarynyń, al 79 myńy kolledjderdiń jataqhanasynda turady. Búginde elimizdegi 259 myń stýdentke jataqhanada oryn kerek. Sonyń 67 paiyzy orynmen qamtamasyz etilse, 33 paiyzyna jataqhana jetispeidi. Biraq, bul san aldamshy da bolýy múmkin. Óitkeni, keibir stýdentter jataqhanada oryn alýǵa ótinish bermeidi. Qazirgi ýaqytta 92 770 stýdentke jataqhanalarda oryn joq. Bul bizdiń oiymyzsha, tez arada sheshimi tabylýy qajet máselelerdiń biri. Jataqhanalardan oryn ala almaǵan stýdentterdiń 64 myńy joǵary oqý oryndarynda, 28 myńy kolledjderde oqidy», - dedi «Jas Otan» jastar qanatynyń jetekshisi.
Onyń dereginshe, Almatynyń JOO-lary men kolledjderinde 36 myńnan astam, Nur-Sultan qalasynda 17 myń, Shymkentte 7,5 myń, Túrkistan oblysynda 5 myńnan astam jataqhana orny jetispeidi.
