ەلٸمٸزدە 93 مىڭعا جۋىق ستۋدەنت جاتاقحانادان ورىن الا الماي جٷر. بۇل تۋرالى بٷگٸن «Nur Otan» پارتيياسى جانىنداعى «Jas Otan» جاستار قاناتىنىڭ جەتەكشٸسٸ ەلنۇر بەيسەنباەۆ مەلٸم ەتتٸ, دەپ حابارلايدى "ۇلت اقپارات".
«قاڭتار ايىنىڭ سوڭىنان باستاپ اقپان ايىنىڭ ورتاسىنا دەيٸن جاتاقحانالاردى تەكسەردٸك. باستى ماقساتىمىز جاتاقحانالارداعى جاعدايدى بٸلۋ بولدى. قازٸرگٸ ۋاقىتتا رەسپۋبليكادا 645 جاتاقحانا بولسا, سونىڭ 270-ٸن تەكسەردٸك. ال 375 جاتاقحانا تەكسەرٸلٸپ جاتىر. بٸردەن ايتا كەتۋ كەرەك, تەكسەرٸلگەن بارلىق جاتاقحانا جاعدايى ورتاشا نەمەسە تٶمەن», - دەدٸ ول.
ەلنۇر بەيسەنباەۆتىڭ دەرەگٸنشە, اتالعان شاراعا باسقا جاتاقحانالاردا تۇراتىن 2 مىڭنان استام ستۋدەنت, سونىمەن قاتار «Jas Otan» جاستار قاناتىنىڭ بەلسەندٸلەرٸ قاتىستى.
«ەلٸمٸزدەگٸ 645 جاتاقحانادا قازٸرگٸ ۋاقىتتا 169 مىڭ ستۋدەنت, ونىڭ ٸشٸندە 90 مىڭى جوعارى وقۋ ورىندارىنىڭ, ال 79 مىڭى كوللەدجدەردٸڭ جاتاقحاناسىندا تۇرادى. بٷگٸندە ەلٸمٸزدەگٸ 259 مىڭ ستۋدەنتكە جاتاقحانادا ورىن كەرەك. سونىڭ 67 پايىزى ورىنمەن قامتاماسىز ەتٸلسە, 33 پايىزىنا جاتاقحانا جەتٸسپەيدٸ. بٸراق, بۇل سان الدامشى دا بولۋى مٷمكٸن. ٶيتكەنٸ, كەيبٸر ستۋدەنتتەر جاتاقحانادا ورىن الۋعا ٶتٸنٸش بەرمەيدٸ. قازٸرگٸ ۋاقىتتا 92 770 ستۋدەنتكە جاتاقحانالاردا ورىن جوق. بۇل بٸزدٸڭ ويىمىزشا, تەز ارادا شەشٸمٸ تابىلۋى قاجەت مەسەلەلەردٸڭ بٸرٸ. جاتاقحانالاردان ورىن الا الماعان ستۋدەنتتەردٸڭ 64 مىڭى جوعارى وقۋ ورىندارىندا, 28 مىڭى كوللەدجدەردە وقيدى», - دەدٸ «Jas Otan» جاستار قاناتىنىڭ جەتەكشٸسٸ.
ونىڭ دەرەگٸنشە, الماتىنىڭ جوو-لارى مەن كوللەدجدەرٸندە 36 مىڭنان استام, نۇر-سۇلتان قالاسىندا 17 مىڭ, شىمكەنتتە 7,5 مىڭ, تٷركٸستان وبلىسىندا 5 مىڭنان استام جاتاقحانا ورنى جەتٸسپەيدٸ.
