Foto: Artem Geodakian / TASS
Májilis depýtaty Nartai Aralbaiuly elimizde kazinolar men býkmekerlik keńselerdiń jyldyq qarjylyq ainalymyn jariialady. Ol 2020 jyly qumar oiyndardyń ainalymy 89 mlrd teńge bolǵanyn, 2022 jyly 500 mlrd teńge, al biyl jyl basynan beri 1 trln teńgeden asaqanyn aitty, dep habarlaidy Halyq Uni portaly.
Onyń aitýynsha, resmi derekte qumar oiynǵa qyzyqqan bir adamdy emdeýge keminde 5 ai ýaqyt ketedi. Emniń ózine aiyna 600 myń teńge jumsalady.
"Bul, árine, adam qumar oiyndy qaitadan oinamaidy degen sóz emes. Mamandardyń aitýynsha, 9 jyl lýdomaniiadan emdelgen adam ortalyqtan shyǵa sala qaitadan qumar oiynǵa salynyp ketken. Bul – bir ǵana mysal. Elimizde 700 myń oqýshy qumar oiyn oinaidy. Al jalpy, kazinolar men býkmekerlik keńselerdi, oilain kazinolardy tolyq jaýyp tastap, jarnamasyn toqtatý kerek pe degen másele bar", – dedi ol.
Sondai-aq depýtat lýdomaniiadan adamdy emdeýdiń joldaryn izdeý kerektigin aitty.
Derekke súiensek, qazir elimizde qumarlyqtyń quryǵyna túsip, shyrǵalańǵa shatylǵan jandardyń sany 350 myń adamnan asqan. Munyń ózi – 2022 jylǵy derek. Qumar oiynnyń jeteginde ketken adamnyń sany budan da kóp bolýy múmkin. Áli tirkelmegender de kóp.
Qumar oiyn men ishimdikke salynǵandardy emdeitin Komekcenter ortalyǵynyń direktory, psiholog Nurlybek Tursynbekovtiń aitýynsha, aýrý adam tańdamaidy. Jan-jaqty, keshendi em júrgizilmese, odan qutylý múmkin emes. Qumar oiynǵa salynǵan er-azamattardyń kóbi oiyndy jetkinshek kezinde bastaǵan. Al áielderdiń basym bóligi 30 jastan keiin kelgen.
Qumar oiynǵa qyzyǵýshylar Almaty qalasynda kóp. Olardan Almaty oblysy men Astana qalasy qalyspai keledi. Pandemiia kezinde qumar oiynǵa qyzyǵýshylar sońǵy 2 jyldaǵy kórsetkishpen salystyrǵanda, 6 ese artqan. Sol kezde býkmekerlik kompaniialar bir jyldyń ishinde 79 mlrd teńgege baiyǵan.
