Foto: parlam.kz
Qazir elimizde shamamen 2 million otbasynyń baspanasy joq. Olar páter jaldap júr. Bul týraly Májilis depýtaty Elnur Beisenbaev aitty, - dep habarlaidy Massaget.kz portaly.
Ol búginde Qazaqstanda baspana máselesi áli ózekti ekenin jetkizdi.
"Qazir birde-bir memlekettik turǵyn úi baǵdarlamasy qalmady. Ózin áleýmettik memleket dep tanyǵan el úshin – bul nonsens. Dál búgin úi kezeginde 650 myń adam tur. Bul - shamamen 2 million otbasy múshesi páter jaldap júr degen sóz. Onyń ishinde úshten biriniń qarjy jinaý múmkindigi múldem joq, iaǵni tapqan tabystary tamaǵynan artylmaidy. Jylyna 9 myńǵa jeter-jetpes qana áleýmettik baǵyttaǵy úi salynady. Al bir jylda kezekke 50 myń adam turady. Bul qandai saiasat, bul nendei menedjment? Úi bolmai, kúi bolmas!", - dedi depýtat Májilistiń jalpy otyrysynda.
Elnur Beisenbaev mańyzdy jobalarǵa qarjy bólinetinin, biraq aqsha ýaqytynda igerilmeitinin aitty.
"Bir ǵana mektep máselesin mysalǵa keltirsek jetkilikti. Biýdjetten 2023 jyly mektepterdiń qurylysyna bólingen qarajattyń kólemi 164 milliard teńge bolsa, onyń tek 37 paiyzy ǵana igerilgen. Bul da úlken problema.
Sonymen qatar memlekettik satyp alýdyń taǵy bir olqy tusy bar. Biýdjetten aqsha bólemiz, al qajetti jumystar bastalmaidy, nysan salynbaidy. Birin-biri sotqa súiregen kompaniialardyń jeke múddesi men renishinen áleýmettik nysandar toqtap qalyp jatyr. Bul is keminde 3-4 ai ai qarastyrylady. Sońynda joba quny qymbattaidy, nysan ýaqtyly salynbaidy. Kóbinde shaǵym dáieksiz bolady", - dedi Amanat fraktsiiasynyń tóraǵasy.
