Elimizde 1200-ge jýyq aýyl áli kúnge deiin aýyz sýmen qamtamasyz etilmegen. Bul týraly Antikor Live baǵdarlamasynda Sairov - QR Parlamenti Májilisiniń depýtaty Erlan Sairov aitty, dep habarlaidy QazAqparat.
«30 jyl ishinde aýyzsý máselesine 1 trln teńge jumsalǵan. Elimizde 1200-ge jýyq aýyl áli kúnge deiin aýyz sýmen qamtamasyz etilmegen. Memleket basshysy 2025 jylǵa deiin aýyzsý máselesin 100% sheshý kerek ekenin aitty. Bul máselede sheshilmegen problemalar kóp», - deidi Nur Otan partiiasy janyndaǵy Sybailas jemqorlyqqa qarsy is-qimyl jónindegi qoǵamdyq keńestiń tóraǵasy Erlan Sairov.
Onyń aitýynsha, aýyzsý máselesin sheshý tetikteri ministrlikter jáne ákimdikter arqyly qarjylandyrylady.
«Bul baǵytta problema kóp. Mysaly, Shyǵys Qazaqstan, Almaty oblystarynda aýyldan eki shaqyrymdyq jerge sý shyǵaratyn úlken nasostar ornatylǵan. Árbir nasosqa 30-40 mln teńge ketedi. Biraq sol aýyldarǵa magistral tartylmaǵan. Magistral tartylǵansha ol nasostar isten shyǵyp qalady. Sonda halyqtyń qanshama milliard teńgesi jelge ushýda. Munyń bári jergilikti sheneýnikterdiń nemqurailyǵy. Nemqurailylyq - jemqorlyqtyń túptamyry», - deidi ol.
