Qazaqstandyq boksshy Daniiar Eleýsinov (7-0, 3KO) amerikalyq Reshard Hikspen (12-0-1, 6KO) jekpe-jegi aldynda mindetti salmaq ólsheý rásiminen ótti, dep habarlaidy "Ult aqparat".
VKontakte áleýmettik jelisindegi «Qazaqstannyń kásipqoi boksy» akkaýntyndaǵy málimetke sáikes, Eleýsinov tarazyda — 147,4 fýnt, Hiks 147 fýnt kórsetti. Jartylai orta salmaqtaǵy limit 147 fýntty quraidy.
Aita keteiik, Eleýsinov-Hiks aiqasy 14 qyrkúiek kúni Niý-Iorktiń (AQSh) «Madison Square Garden» arenasynda ótedi. Qazaq boksshysynyń menedjeri Ziia Áliev Daniiardy Derik Santos, Garri Klark jáne Daniiardyń ákesi Marat Eleýsinov daiyndap jatqanyn jáne negizgi jattyǵýlar aiaqtalǵanyn málim etken edi.
Keiin birlesken baspasóz máslihaty kezinde Eleýsinov boks keshi barysynda bar kúsh-jigerin salatynyn atap ótti. «Niý-Iorkke, «Madison Square Garden»-ge, promoýterim Eddi Hirnge jáne menedjerlerime «Bokstyń Mekkesinde» judyryqtasý múmkindigi úshin alǵys aitamyn. Men sizderge sheberligim men aqylymdy juma kúni keshkisin kórsetetin bolamyn. Kóriskenshe!» - dedi ol.
Jekpe-jekti Nur-Sultan ýaqyty boiynsha 14 qyrkúiek kúni saǵat 06.00-de «Habar» arnasynan kórýge bolady.
Olimpiada chempiony profi-ringtegi sońǵy kezdesýin biylǵy 25 mamyrda AQSh-tyń Merilend shtatynda ótkizdi. Ol tóreshilerdiń sheshimimen chililik Lýs Norambýenany (3-4-1, 0 KO) jeńdi.
