Foto: QTF baspasóz qyzmeti
Qazaqstan áielder quramasynyń kóshbasshysy Elena Rybakina 2022 jylǵy Ýimbldon týrnirindegi jeńisinen keiin syiaqy qarjysynyń bir bóligin qaiyrymdylyqqa jáne Qazaqstandaǵy jastardy qoldaýǵa jumsaitynyna ýáde bergen edi.
«Taiaýda Elena Astanada qańǵybas janýarlardy qutqarýmen ainalysatyn «StopOtlov» eriktiler qozǵalysyna qarjy aýdardy.
Sondai-aq jýyrda Qazaqstannyń birinshi raketkasy jas tennisshilerdiń bolashaqta ózi siiaqty top-oiynshy bolýy úshin qarqyndy damýyna qarjy bóldi. Rybakina kimge qoldaý kórsetý kerektigin ózi tańdady. 14 oiynshy 2,5 mln teńgeden aldy. Linara Bólesheva, Polina Barabanova, Ámina Nurmahan, Ariana Gogýlina, Sátima Tóregen, Eva Korysheva, Albina Kákenova, Asyljan Arystanbekova, Dana Baidáýlet, Ińkár Dúisebai, Aiia Nupbai, Polina Sleptsova, Sandýǵash Kenjebaeva, Zara Dárken», - delingen Qazaqstan tennis federatsiiasynyń habarlamasynda.
Qazaqstandyq jáne halyqaralyq arenalarda jeńiske jete bastaǵan qyzdardyń árqaisysy óziniń tennistegi tarihyn aityp, Elenaǵa hat jazǵan. Bastapqyda Elenadan bólingen qarjy azdaý edi, keiin Ýimbldon jeńimpazy grant sany men kólemin kóbeitti.
«Týrnir uiymdastyrý nemese jas oiynshylar úshin grant belgileý durys bola ma dep oilaimyn, óitkeni ózim de kezinde Qazaqstannan úlken qoldaý aldym. Endi jas urpaqtyń damýyna meniń kómek kórsetetin kezegim keldi», - degen edi Rybakina Ýimbldondaǵy jeńisinen keiin.
