Qazaqstan Qarjygerler qaýymdastyǵynyń tóraǵasy Elena Bahmýtova QR Ulttyq bankiniń bazalyq stavkasynyń kóterilýine qatysty túsinik berdi, dep habarlaidy "Ult aqparat".
Onyń aitýynsha, bazalyq mólsherlemeniń 12 paiyzǵa kóterilýi makroekonomikalyq ahýaldy turaqtandyrýǵa baǵyttalǵan.
«Durys áreket. Bul - bizdiń birinshi daǵdarys emes. Meniń oiymsha, osyǵan uqsas sharalar basqa elderde de jasalady. Kórshiles Reseide de bolýy yqtimal», - dedi ol.
Onyń aitýynsha, áleýmettik ekonomikalyq turaqtylyq basty nazarda bolýy tiis.
QR Úkimeti qazir osy máselege basymdyq berip otyr. Ol úshin arnaiy shtab quryldy.
«Qazaqstan ekonomikasy ashyq bolǵandyqtan, oǵan álemdegi ahýal qatty yqpal etedi. Qazir qandai sharalar qolǵa alynatyny anyqtaldy. Basymdyq beriletin salalarǵa resýrstardy jinaý kerek. Keibir investitsiialyq shyǵyndardan bas tartý qajet. Bul eń aldymen kvazimemlekettik sektordaǵy, odan keiin jeke sektordaǵy kásiporyndarǵa yqpal etýi tiis. Ishki resýrstardy iske qosý abzal bolady», - dedi ol.
Elena Bahmýtova osy maqsatta QR Úkimeti men Ulttyq banki jáne Qarjylyq naryqty retteý agenttigi úsh jaqtan birigip keshendi sharalardy qolǵa alýy kerektigin aitty.
«Keshe barlyq jerde indekster qulady. Sol úshin keshendi sharalar oilastyrý kerek. QR Qarjy ministrligi keibir biýdjettik shyǵyndardy azaityp, Respýblikalyq biýdjet týraly zańǵa ózgeris engizetin bolady. Buǵan týra 1 apta ýaqyt bar», - dedi E.Bahmýtova.
QQQ tóraǵasynyń aitýynsha, qarjylyq sektorda aktivterdiń sapasy baǵalandy.
«Bul jerde kútpegen tosyn jańalyq bolmaitynyna kóz jetkizdik. Endi barlyq kúshti ekonomikalyq salany turaqtandyrýǵa salatyn bolamyz. Birinshi kezekte jumys oryndaryn saqtap qalý, importtyń ornyn almastyrý, memlekettik tapsyrystarda qazaqstandyq óndirýshilerdiń bolǵany, halyqty óndiristik jumyspen qamtý, olardyń tabys tabýy qamtamasyz etý kózdelgen», - dedi QQQ tóraǵasy.
Aita ketý kerek, QR Ulttyq banki syrtqy sektor tarapynan táýekelderge teris yqpal etý aiasynda baǵa turaqtylyǵyn qoldaý qajettiligine negizdelgen bazalyq mólsherlemeniń deńgeii boiynsha kezekten tys sheshim qabyldaǵan bolatyn.
Sondai-aq COVID-19 virýsy indeti keibir elderdi retsessiiaǵa ushyratyp, jahandyq ekonomika ósimin 2,5% -dan tómen deńgeige deiin quldyratýy múmkin.
Óitkeni, koronavirýstyń órshýinen tikelei sheteldik investitsiia (TShI) aǵyny kólemi qysqarady. BUU-nyń Saýda jáne damý jónindegi konferentsiiasy (IýNKTAD) uiymy osylai málim etti. Aldyn ala boljam boiynsha, koronavirýs saldarynan álemdik ekonomika shyǵyny 2 trln dollardy, al damýshy elderde 220 mlrd dollardy quraýy múmkin.
