Kóleńkeli ekonomika deńgeiin tómendetý úshin áleýmettik jeli arqyly saýda júrgizetinderge tabys salyǵy salynbaidy. Qarjy ministrligi elektrondy saýda biznesiniń ókilderine osyndai jeńildik berip otyr, dep habarlaidy QazAqparat.
«Osy jyldan bastap salyq zańnamasyna birshama ózgertý engizdik. Sonyń ishinde tabys salyǵy boiynsha 0 paiyz stavkasyn qoldanamyz. Elektrondy saýdamen ainalysatyndardy biznes ókilderin kóleńkeden shyǵarý úshin salyq zańnamasy boiynsha jeńildikter berip jatyrmyz. Bizdiń oiymyzsha, áleýmettik jeli – keleshekte tabystyń orasan zor kózi bolary anyq», - dedi QR QM Memlekettik kirister komiteti tóraǵasynyń orynbasary Jaidar Ińkárbaev Úkimettiń baspasóz ortalyǵynda.
Komitet ókiliniń aitýyna qaraǵanda, elektrondy alańda qazirgi tańda arnaiy baqylaý jumystary júrgizilip keledi.
«Osyndai sanatta biznespen ainalysatyndardy tirkeý boiynsha jumys júrgizilýde. Biraq, qadaǵalaý jáne baqylaý jumystary bolashaqta atqarylady. Ázirge tirkeý boiynsha tek nasihattaý jumysyn qolǵa aldyq», - dedi ol.
Eske sala ketsek, osy jyldyń basynda Aqparat jáne qoǵamdyq damý ministri Dáýren Abaev Qazaqstanda elektrondy saýdanyń kólemi artyp kele jatqanyn atap ótken bolatyn.
