Indýstriia jáne infraqurylymdyq damý, Saýda jáne integratsiia ministrlikteri elektr jelisi tirekteriniń sapasyna qoiylatyn talaptardy qaita qaraýdy ótindi, dep habarlaidy QazAqparat.
Nurlan Noǵaev mundai ótinishti áriptesterine Úkimet otyrysy kezinde aitty.
«Biyl 13 naýryzda muzdy jańbyr men ekpindi jeldiń kesirinen elektr symdary muzdanyp, «KEGOC» aktsionerlik qoǵamyna tiesili elektr berý jelisiniń 243 tiregi jáne «Ońtústik Jaryq Tranzit» JShS-ne tiesili elektr jelisiniń 5270 tiregi qulady. Sonyń saldarynan Túrkistan oblysynyń 83 eldi mekeni elektrsiz qaldy», - degen vedomstvo basshysy sońǵy jyldary elektr jelisiniń boiyndaǵy dińgekterden jii aqaý shyǵa bastaǵanyn problema etip kóterdi.
«Sońǵy jyldary tabiǵat qubylystarynyń saldarynan Qazaqstannyń birtutas elektr energetikalyq júiesiniń elektr jelileri jalǵanǵan temirbeton tirekterdiń búliný jaǵdailary jiilep ketkenin atap ótkim keledi. Osyǵan bailanysty, elektr jelileriniń qolaisyz tabiǵi-klimattyq áserlerge senimdiligi men tózimdiligin arttyrý úshin Indýstriia jáne infraqurylymdyq damý, Saýda jáne integratsiia ministrlikterindegi áriptesterime elektr jelileriniń tirekteri men olardyń konstrýktsiialyq elementteriniń sapasyna qoiylatyn qoldanystaǵy standarttar men basqa da normalardyń talaptaryn qaita qaraý týraly ótinish bildirgim keledi», - dedi ol.
