Rio Olimpiadasynyń kúmis júldegeri jáne 2015 jylǵy álem chempiony Eldos Smetov Aqtaýda «Ádil dziýdo» klýbynyń dziýdoshylaryna sheberlik sabaǵyn ótkizdi, dep habarlaidy QazAqparat.
Jastar chempionnyń árbir qimyl-qozǵalysyn muqiiat baqylap, aitqan aqyl-keńesterin tyńdady. Eldos Smetov tatamide jas sportshylarmen qatar turyp óziniń ádis tásilderin kórsetti. Tipti olarmen jeke-jeke beldesip, jastarǵa senimdilik syilap, yntalandyrdy.
Sondai-aq, álemge belgili sport sheberi jastarmen suhbattasyp, olardyń qoiǵan suraqtaryna jaýap berdi.
«Qazirgi tańda kúresti qoimai jatyp, jastarmen tatamide kezdesýler ótkizý – olarǵa úlken motivatsiia dep aita alamyn. Sondyqtan ár aimaqqa barǵanda aýdandardy aralap, sport súier jastarǵa sheberlik sabaǵyn úiretemin. Meniń tájiribem mol. Ózim ǵana bilmei, ózgelerge de úiretýim kerek. Jalpy, Aqtaýǵa demalýǵa keldim», - deidi dziýdodan álem chempiony Eldos Smetov.
