Álemdegi bolyp jatqan jaǵdailardy kórip, estip, shoshisyń. Osyndaida qarapaiym halyq zábir kórip, japa shekpeýi úshin tirlik etken jón dep oilaisyń. Bir ǵana Reseidiń ózi elimizdiń ahýalyna áser etip otyr. Birinshiden, bul – tarihi ózgeris, tarihi jaǵdai, tarihi arpalys. Qai zamanda da, qai kezde de osyndai jaǵdai bolyp turǵan. Reseilikterdiń jappai bizge kelip jatqanyndai, Keńes úkimeti tusynda biz de shubyryp basqa elge bardyq. Árine, ult janashyry retinde bul áreket maǵan unamaýy múmkin. Biraq adami turǵyda alsaq, orystardy biz birinshi ret kórip turǵanymyz joq. Olarmen birge kele jatqanymyzǵa qanshama ǵasyrdyń júzi boldy. Qazir basty másele el amandyǵy, jurttyń tynyshtyǵy kerek.
Óner adamy retinde birdeńeni kesip-piship aitý ońai emes. Shynyn aitsaq, eshteńege kózim jetip otyrǵan joq. Eki oilymyn. Qazir qoǵamnyń ózi eki aiyrylyp otyrǵandai. Alaida biz eldiń qaýipsizdigin oilaýymyz tiis. Olardyń tutasatyn jeri – tatýlyq, aýyzbirshilik. Búginde dinderdiń bitimgerlik áleýetin paidalanyp, uzaq merzimdi turaqtylyqqa qol jetkizý úshin rýhani kóshbasshylardyń kúsh-jigerin biriktirý qajet.
Al barlyq dinniń negizinde gýmanistik idealdar, adam ómiriniń joǵary qundylyqtary, beibitshilik pen jasampazdyqqa umtylý siiaqty izgi amaldar jatady. Sonyń bir izi – sońǵy kezde elimizge Rim Papasynyń kelýi, Dinder sezi men keshegi sammittiń ótýi. Sonda Rim Papasy Frantsisk qazaqtyń uly filosofy Abaidyń oilaryn mysalǵa keltire otyryp, «adam máńgilik emes. Sondyqtan biz ekonomikalyq suranystardy qanaǵattandyrý úshin ǵana emes, rýhani dúnieni baiytýmen de ainalysýymyz kerek. Álemdegi adamdardy rýhani qasietter biriktirse ǵana álemde birlik ornaidy» degen.
Eger shekara bútip, syrttan shabýyl jasalmasa, tórt qubylamyz túgel bolady. Memleket basshysynyń «Bizdiń Táýelsizdigimiz bárinen qymbat» degeni táýelsizdigimizdi kózimizdiń qarashyǵyndai saqtaý keregin meńzegeni. Sondyqtan elimizdiń tutastyqty saqtaiyq. Bile bilsek, halyqtyń amandyǵy men tynyshtyǵynan asqan baqyt joq.
Elmura Jańabergenova,
Qazaqstannyń eńbek sińirgen qairatkeri, ánshi
