Elimizdiń ońtústiginde elektr energiiasynyń ajyraýyna tsifrlyq mainingtiń qatysy joq. Bul týraly «KEGOC» kompaniiasynan málim etti, dep habarlaidy QazAqparat.
Búgin «KEGOC» kompaniiasy 25 qańtarda Qazaqstannyń ońtústik óńirlerinde elektr jaryǵynyń óshý sebebin anyqtaý boiynsha komissiia qorytyndysyn jariialady.
«Apattyń tsifrlyq mainingti tutynýshylardyń qyzmetimen bailanysty emes ekendigin aita ketken jón. Tsifrlyq mainingti júzege asyratyn tutynýshylarǵa elektr energiiasyn jetkizýdiń bolmaýyna qatysty QR Birtutas elektr energetikalyq júiesinde elektr energiiasynyń tapshylyǵy kezdesetin jaǵdai saqtalyp otyrǵandyǵyn habarlaimyz», - delingen kompaniia aqparatynda.
Taratylǵan málimetke qaraǵanda, tapshylyqtyń paida bolýynyń negizgi faktorlary elektr stantsiialaryndaǵy joǵary avariialylyq jáne ótken jyly 6 paiyzdan asyp ketken elektr energiiasyn tutynýdyń aitarlyqtai ósýi bolyp otyr.
«Bul sońǵy jyldardaǵy kórsetkishterden 3 ese artyq. Salystyratyn bolsaq, 2020 jyly elektr energiiasyn tutynýdyń ósimi – 2, 2019 jyly 1,9 paiyzdy qurady. Elektr energiiasynyń tapshylyǵy jaǵdaiynda, halyqty jáne el ekonomikasyn úzdiksiz elektrmen jabdyqtaýdy qamtamasyz etý maqsatynda «KEGOC» AQ elektr stantsiialarymen jáne energiiamen jabdyqtaýshy uiymdarmen birlesip, Qazaqstan Respýblikasynyń qoldanystaǵy normativtik quqyqtyq aktileriniń talaptaryna sáikes mainingtik data-ortalyqtarǵa elektr energiiasyn josparly jetkizýdi tómendetý boiynsha sharalar qabyldady», - dep atap ótedi «KEGOC» kompaniiasy.
Eske salaiyq, 25 qańtarda (Nur-Sultan ýaqytymen) Ortalyq Aziia (Ózbekstan, Qyrǵyzstan) energiia júiesinde týyndaǵan aqaý saldarynan «Soltústik-Shyǵys-Qazaqstannyń ońtústigi» 500 kV elektr energiiasy tranzitine arnalǵan qýattyń tómendeýi oryn aldy.
Sonyń saldarynan Almatynyń birneshe aýdanynda elektr energiiasy óship qaldy.Sondai-aq Qyzylorda oblysynda elektr energiiasyna bailanysty irkilis boldy.
Budan bólek, áleýmettik jelilerde jaryq Jambyl jáne Túrkistan oblystarynda da óshkeni týraly jazyldy.
Elektr energiiasy Qazaqstanmen qatar, Ózbekstanda jáne Qyrǵyzstan elderinde de óshti.
