Foto: BFK
Bokstan Qazaqstannyń bas bapkeri Myrzaǵali Aitjanov Parijdegi jazǵy Olimpiada oiyndaryndaǵy boks nátijesine qatysty pikir bildirdi. Bas bapker jalǵyz kúmiske qol jetkizgen bylǵary qolǵap sheberleri úshin halyqtan keshirim surady.
"Habar" arnasynyń Telegram-daǵy resmi arnasynda Olimpiadany qorytyndylaǵan bapker birden jigitterdiń daiyndyǵy týraly sóz qozǵady. Ol Parijden tek kúmis júldemen qaitqan bylǵary qolǵap sheberlerine sáttilik jetispegenin alǵa tartty.
"Túsinemin, eldiń, jankúierlerdiń bizdiń jekpe-jekterge kóńili tolǵan joq. Sol úshin keshirim suraimyz. Jalpy eshkim utylamyn dep kelgen joq. Jigitterdiń bári baryn salyp judyryqtasty. Jaqsy daiyndyqpen keldi. Biraq bir sáttilik jetpedi dep oilaimyn. Bizdi jaqtady, qorǵamady demeimin. Men ondaiǵa úirengen emespin. Biz bárin ózimizden kóremiz. Buiyrmai tur, kem-ketik bar shyǵar. Sol sebepti jeńiske jetpegen shyǵarmyz", - dedi ol.
Osy rette Myrzaǵali Aitjanov boksshylardy synaǵandarǵa jaýap berdi. Ol otandastaryna qoldaý kórsetken jankúierlerge alǵys aitýdy umytqan joq.
"Biraq jigitterdiń eshqaisysy sharshaǵan joq. "Sharshady, daiyndyq nashar" degendei nebir sózdi estip jatyrmyz. Búkil álem, áriptesterim bizdiń balalarǵa riza bolyp jatyr. "Jeńisterińdi alyp qoidy ǵoi" degen kezde bizdiń el dattap jatqanyn kórip, "qalai el bolamyz?" dep oilaimyn. Al jalpy barsha jankúierge raqmet. Múmkin, eldiń namysyn qatty oilaǵan soń solai aityp jatqan shyǵar, biraq bári aman bolsyn. Qoldaǵany da, qoldamaǵany da, dattaǵandar da, qoldap jatqandar da... Qazaqpyz, bir-birimizdi osyndaida qoldamaǵanda qalai qoldaimyz? "Menmin" degen álemniń bes dúrkin chempiondary, Olimpiada chempiondary utylyp jatyr, bul – Olimpiada. Bárimizge osy sabaq boldy, jeleý izdemeimiz, kiná ózimizden",- dedi Myrzaǵali Aitjanov.
