Syr óńirinde aýyldyq eldi-mekenderdi sýmen qamtamasyz etý máseleleri talqylandy. Seminarǵa Qyzylorda oblysynyń ákimi Qyrymbek Kósherbaev, QR Aýyl sharýashylyǵy ministrligi Sý resýrstary komitetiniń tóraǵasy Islam Ábishev, QR Qarjy, Investitsiialar jáne damý ministrlikteriniń, «Qazsýshar» RMK jáne ózge de memlekettik organdarynyń ókilderi qatysty.
Aimaq basshysy Elbasy 2011 jyly Qazaqstan halqyna arnaǵan Joldaýynda 2020 jyly aýyldyq eldi mekenderdiń 80 paiyzyn ortalyqtandyrylǵan aýyz sý júiesine qosý jóninde tapsyrma bergenin atap ótti. Soǵan sáikes, 2011-2020 jyldarǵa arnalǵan "Aq bulaq" baǵdarlamasy qabyldanyp, budan keiin birqatar salalyq baǵdarlamalar yqshamdalyp, 2020 jylǵa deiingi Óńirlerdi damytý baǵdarlamasyna biriktirildi. 2015 jyly qabyldanǵan "Nurly jol" baǵdarlamasy arqyly eskirgen aýyz sý júiesin jańǵyrtý jumystary asa qarqyndy júrgizildi.
«Atalǵan baǵdarlamalar aiasynda Qyzylorda oblysynda maqsatty ári júieli jumystar atqarylýda. Atap aitsaq, 2011-2017 jyldar aralyǵynda biýdjetten 40 mlrd. teńgeden astam qarjy tartyldy. Sonyń nátijesinde, 2,5 myń shaqyrymǵa jýyq aýylishilik jáne servistik júieler jańartyldy, 8,5 myńnan astam sý ólshegish quraldary ornatyldy. Búgingi kúni oblystaǵy 265 aýyldyq eldi mekenniń 199-y nemese 76,5 paiyzy ortalyqtandyrylǵan aýyz sý júiesine qosylǵan. Halyq sanyna shaqqanda, 97 paiyzdy quraidy», - dedi oblys ákimi.
QR Aýyl sharýashylyǵy ministrligi Sý resýrstary komitetiniń tóraǵasy Islam Ábishevtiń aitýynsha, qazirgi tańda respýblika boiynsha ortalyqtandyrylǵan aýyz sýmen qamtý kórsetkishi 57,4 paiyzdy quraidy. Sonymen qatar, sheshimin áli tappaǵan taǵy da birqatar problemalyq másele bar. Máselen, aýyldyq eldi mekenderdi sýmen qamtý jáne sýdy burý jónindegi Biryńǵai operatordy qurý máselesi ózekti máseleleriniń biri bolyp tabylady.
«Bárimizge belgili, Qazaqstan Respýblikasy Premer-Ministri B.A. Saǵyntaevtyń 2017 jylǵy 22 qarashadaǵy №11-3/07-623 Hattama qaýlysymen Aýyl sharýashylyǵy ministrligine sýmen jabdyqtaý jáne sýdy burý júieleri fýnktsiialaryn berý máselelerin jáne «Qazsýshar» RMK usynatyn biryńǵai operatordy qurý týraly máseleni qarjylandyrý kózderin anyqtaý tapsyryldy», - dedi QR Aýyl sharýashylyǵy ministrligi Sý resýrstary komitetiniń tóraǵasy Islam Ábishev.
Sondai-aq, komitet tóraǵasy ortalyq deńgeide Biryńǵai operatordy qurý máselesi oń sheshimin tapsa, jergilikti jerde bul máseleni keibir aimaqtar ǵana qoldaǵanyn aitty.
Atap ótken jón, Qyzylorda oblysynda respýblikada alǵashqylardyń biri bolyp 2017 j. 1 maýsymynan bastap Filial negizinde sýmen qamtý jáne sýdy burý jónindegi Biryńǵai operatory quryldy. Atap aitqanda, jergilikti sýmen qamtý júieleri kommýnaldyq menshikten respýblikalyq menshikke, iaǵni «Qazsýshar» RMK «Aral» ODSP filialynyń teńgerimine berildi.
Seminar-keńes barysynda Qyzylorda oblysynyń tájiribesi týraly oblys ákiminiń orynbasary Serik Súleimenov baiandap berdi.
«Oblysta sýmen qamtý jónindegi Biryńǵai operatordy qurý tarihy 2012 jyly bastaldy. Atap aitqanda, respýblikada alǵashqylardyń biri bolyp 2017 j. 1 maýsymynan bastap Filial negizinde sýmen qamtý jáne sýdy burý jónindegi Biryńǵai operatory jumysyn bastady. Biryńǵai operatordy qurý sýdy sońǵy tutynýshyǵa jiberý boiynsha qyzmetterdi tiimdi, sapaly ári júieli ótkizýge ári qurylǵylardy paidalaný jáne jóndeý jumystaryn óz kúshimen júzege asyrýǵa múmkindik beredi», - dedi Serik Súleimenov.
