Qazir elder, geosaiasi bloktar arasynda jańa qamaldar, jańa «temir perdeler» ornatylyp jatyr. Qazaqstan Prezidenti Nursultan Nazarbaev Álemdik jáne dástúrli dinder kóshbasshylarynyń VI sezinde osylai aitty, dep habarlaidy Baq.kz tilshisi.
«Biz barshamyzǵa ortaq planetany keler urpaqqa qandai kúide jetkizemiz? Bul - órkeniettiń basty suraǵy, basty máselesi. Mine, úshinshi myńjyldyqtyń 18 jylyn bastan ótkerip otyrmyz. Alaida beibitshilik, baqýatty, berekeli ómir adamzattyń negizgi úrdisine ainala qoimady. Álemdik qoǵamdastyq ózara senbeýshilik, jek kórýshilik, qaqtyǵystar sheńberinen shyǵa almai otyr. Kórip otyrǵanymyzdai, jaǵdai jaqsarmady, kerisinshe nasharlai tústi. Elder, geosaiasi bloktar arasynda jańa qamaldar, jańa temir perdeler ornatylýda. Ekonomikada, qarjy salasynda kedergiler paida bolyp jatyr. Olar bir-birinen asyp-túsýge tyrysyp, bir-birin qyryp-joiýǵa quraldar jasap, buǵan qyrýar kúsh jamsaýda. Kerisinshe, biz yntymaqtastyq úshin jaǵdai jasap, halyqtardyń órkenieti úshin birlesken jobalar jasaýymyz kerek. Biz qate joldan arylýymyz qajet. Sondyqtan, barshamyz progress, damý jolyna qaita túsýimiz kerek. Buny tez qolǵa alý qajet. Óitkeni kún saiyn adamdardyń taǵdyry sheshilip jatyr. Myńdaǵan, milliondaǵan adam týǵan jerlerin, shańyraqtaryn tastap ketýge májbúr. Kóptegen adam iz-tússiz joǵalýda. Búgingi kúni bosqyndar sany 60 millionnan asyp túsedi. Bul ashyq qaqtyǵystardyń ǵana áserinen bolyp otyrǵan joq», - dedi Nazarbaev.
Memleket basshysynyń aitýynsha, qazir adamzat bar kúsh-jigeri men qarajat-quraldaryn qaqtyǵystarǵa jumsap otyr. Sol sebepten olar tabiǵi apattardan qorǵaný úshin kúsh, qarajat pen qural-jabdyq tappai qalady.
«Tehnologiialyq damý men álem bailyǵyna qaramastan áleýmettik apattar kólemi keńeiip jatyr. BUU málimetterine sáikes, planeta halqynyń 14 paiyzy ash, jumyssyzdardyń jalpy sany 190 milionnan asyp túsedi. Bul áleýmettik teńsizdikti kúsheitedi. Al bul óz kezeginde radikalizmge negiz bolady. Sondyqtan eń basty másele – qaýipsiz, ádiletti álem qurý», - dedi Nursultan Nazarbaev.
Atap ótsek, búgin Astanada Álemdik jáne dástúrli dinder kóshbasshylarynyń VI sezi bastaldy. Dini kóshbasshylar keńesiniń úshinshi otyrysyn Qazaqstan Respýblikasy Parlamenti Senatynyń tóraǵasy Qasym-Jomart Toqaev ashty. Al «Dini kóshbasshylar qaýipsiz álemdi jaqtaidy» taqyrybyndaǵy jalpy otyrys Qazaqstan Prezidenti Nursultan Nazarbaevtyń tóraǵalyǵymen ótip jatyr. Jiyn túrli ult ókilderinen qurylǵan hor ansambliniń ánimen ashyldy.
Sezd eki kúnge jalǵasady. Onyń jumysyna barlyq álemdik jáne dástúrli dinderdiń ókilderi, bedeldi dini kóshbasshylar, saiasi qairatkerler men halyqaralyq uiym ókilderinen quralǵan 46 elden 82 delegatsiia qatysyp otyr.
Álemdik jáne dástúrli dinder kóshbasshylarynyń sezi alǵash ret Qazaqstan Prezidenti Nursultan Nazarbaevtyń bastamasymen 2003 jyldyń 23-24 qyrkúieginde shaqyrylǵan bolatyn.
