Sýret: Aqorda
Premer-ministrdiń orynbasary Qanat Bozymbaev úkimettiń sý tasqyny saldaryn joiý jáne zardap shekken azamattarǵa kómek kórsetý úshin atqaryp jatqan jumystary jóninde málimet berdi, dep habarlaidy "Ult aqparat" Aqordaǵa silteme jasap.
Qanat Bozymbaevtyń esebi boiynsha:
- búginde 64 myńnan astam adam óz úilerine oralǵan;
- evakýatsiialyq pýnktterde turǵyndarǵa qajetti kómek kórsetilýde;
- tabiǵat apaty kezinde jalpy 11998 turǵyn úidi, 5359 saiajai qurylysyn sý basqan;
Bozymbaev zardap shekken óńirlerde 16715 úi tekserýden ótkenin aitty. Onyń ishinde 15464 nysandy baǵalaý jumystary aiaqtalǵan. Baǵalaý nátijesi boiynsha 9903 úidi jóndeýge bolady, al 6875 úi qalpyna keltirýge jaramsyz dep tanylǵan.
Jaramsyz úilerdiń ornyna naryqtan 4525 úi men páter satyp alý, sondai-aq tiptik jobamen 2350 úi salý josparlanyp otyr:
- búginde naryqtan 1814 páter men úi satyp alý úshin kelisimsharttar jasalǵan;
- zardap shekken aimaqtardaǵy 841 otbasy burynǵy buzylǵan úileriniń ornyna jańa baspanaǵa qonystanǵan;
- qazirgi ýaqytta 4521 otbasy úilerin jóndeý jáne qalpyna keltirý maqsatynda 57,4 milliard teńge kóleminde ótemaqy alǵan. Jalpy, turǵyn úilerdi qalpyna keltirýge 237 milliard teńge qajet;
Premer orynbasary birrettik tólemderdi tóleý úshin Úkimet tarapynan qabyldanyp jatqan sharalar jóninde baiandady:
- 2024 jylǵy 6 maýsymdaǵy jaǵdai boiynsha 31642 otbasy 100 AEK mólsherinde birrettik tólemaqy alǵan (barlyǵy 32440 otbasydan ótinish tústi). Oǵan jumsalǵan qarjy somasy 11 milliard teńgeden asqan;
- bul baǵyttaǵy jumystar Qaraǵandy, Pavlodar, Aqmola, Abai, Ulytaý oblystarynda tolyq aiaqtalǵan. Al Aqtóbe, Batys Qazaqstan, Soltústik Qazaqstan, Qostanai, Atyraý oblystarynda tólem berý jalǵasyp jatyr;
- búlingen dúnie-múlikke júrgizilgen baǵalaý isi aiaqtalǵannan keiin zardap shekken turǵyndarǵa eń qajetti zattar satyp alý úshin 150 AEK-ke deiingi mólsherde qosymsha ótemaqy tólenedi (5489 otbasy 4 milliard teńge kóleminde ótemaqy alǵan);
- zardap shekken bizneske keltirilgen zalaldy óteý jumystary bastalǵan. Qazirgi ýaqytta óńirlik komissiialar shaǵyn jáne orta biznes sýbektileriniń jalpy somasy shamamen 377 million teńge bolatyn 34 ótinimin qarap, maquldaǵan.
