Eldegi eń tapshy mamandar – jol jumysshysy, kúzetshi, daiarshy, dánekerleýshi, avtokólik júrgizýshisi. Zańgerler men ekonomisterge suranys óte az, dep habarlaidy "Ult aqparat" Energyprom.kz-ke silteme jasap.
Biylǵy jyldyń úshinshi toqsanynda elektrondy eńbek birjasynda (EEB) bilikti jumyskerlerge arnalǵan 176 myń bos jumys orny bar. Bul ótken toqsanmen salystyrǵanda 12,2%-ǵa kóp. Ornalastyrylǵan túiindemeler sany 123,1 myńǵa jetti, ol ekinshi toqsanǵa qaraǵanda 20,2%-ǵa artqan. Jalpy karantinniń engizilýine bailanysty shilde aiynda suranys pen usynystyń tómendeýi baiqaldy, biraq tamyz aiynda karantindik sharalar birtindep álsiregennen keiin bos jumys oryndary men túiindemeler sany artqan.
EEB-da Nur-Sultan, Almaty qalalarynda jáne Qaraǵandy men Qostanai oblystary siiaqty soltústik óńirlerde bos jumys oryndary belsendi túrde ornalastyrylǵan. Bul óńirlerde respýblika boiynsha úshinshi toqsandaǵy barlyq bos jumys oryndarynyń 45%-y ornalastyryldy. Osy kezeńde Nur-Sultan men batys óńirlerinde – Mańǵystaý jáne Atyraý oblystarynda jumys izdeýshiler túiindemelerin belsendi túrde ornalastyrǵan.
Elimizde eń kóp suranysqa ie mamandar — jol jumysshysy (6,8 myń bos jumys orny), kúzetshi (4,9 myń bos jumys orny), avtomobil júrgizýshisi (4,3 myń bos jumys orny), bastaýysh synyp muǵalimi (3,3 myń bos jumys orny) jáne medbike (2,9 myń bos jumys orny).
2020 jyldyń úshinshi toqsanynda eń tapshy mamandar – jol jumysshysy (bos jumys oryndar sany túiindeme sanynan 4,8 myńǵa asady), kúzetshi (3,2 myńǵa), daiarshy (1,5 myńǵa), dánekerleýshi (1,5 myńǵa) jáne avtomobil júrgizýshisi (1,4 myńǵa).
Sonymen qatar, Qazaqstandaǵy eń qajet emes mamandar – zańger (jumys izdeýshilerden túsken túiindemeler sany bos jumys oryndarynyń sanynan 1,7 myńǵa artyq), ekonomist (649 túiindemege), injener-programmist (642 túiindemege), dene shynyqtyrý jáne sport muǵalimi ( 617 túiindemege) jáne feldsher (604 túiindemege).
