QR Premer-Ministri Álihan Smaiylov eldegi búkil oqý oryndarynyń órtke qarsy qaýipsizdik deńgeiin tekserý týraly tapsyrma berdi, dep habarlaidy QazAqparat.
«Tótenshe jaǵdailar ministrligi múddeli memlekettik organdarmen birge biylǵy Orman jáne dala órtteriniń aldyn alý jónindegi vedomstvoaralyq is-sharalar josparyn sapaly júzege asyrýdy qamtamasyz etsin.
Bilim jáne ǵylym ministrligimen jáne ákimdiktermen birlesip, eldegi barlyq oqý oryndarynyń órt qaýipsizdigi talaptaryna sáikestigin teksersin», - dedi ol Úkimet otyrysynda.
Onyń aitýynsha, oqý oryndarynda signalizatsiianyń, gidranttar men órt sóndirgishterdiń, órt kezindegi apattyq shyǵýlardyń jumysqa jaramdylyǵy tekserilýi qajet.
«Balalardyń qaýipsizdigi úshin barlyq qajetti sharalar qabyldanýy tiis. Sonymen qatar, halyqqa órt qaýipsizdigi talaptaryn saqtaý, órt shyqqan ǵimaratta, dala jáne orman órti kezinde qalai áreket etý qajettiligi týraly túsindirý jumystaryn júrgizýdi tapsyramyn», - dedi Premer-Ministr.
Aita keteiik, Úkimet otyrysynan keiin ótken brifingide QR Ekologiia, geologiia jáne tabiǵi resýrstar ministri Serikqali Brekeshev Qyrǵyz Resýpblikasynan keletin sý boiynsha eshqandai táýekel joq ekenin málim etti.
