Qorǵanys ministrliginde Qarýly Kúshterdiń barlyq obektilerindegi oq-dárilerdiń saqtalý jaǵdaiyn tekserý jóninde komissiia quryldy, dep habarlaidy "Ult aqparat" vedomstvonyń baspasóz qyzmetine silteme jasap.
Qorǵanys vedomstvo basshysy N. Ermekbaevtyń buiryǵymen Qorǵanys ministrligi Bas inspektsiiasynyń bastyǵy general-leitenant Ámir Halyqov basshylyq etetin Qarýly Kúshterdiń barlyq qoimalaryndaǵy oq-dárilerdi tekserý komissiiasynyń quramy taǵaiyndaldy.
Sheshim Jambyl oblysynda oryn alǵan oqiǵaǵa bailanysty qabyldandy. Alǵashqy sátten bastap-aq qorǵanys ministri órt saldaryn joiý jumystaryn uiymdastyryp, oqiǵanyń týyndaý sebepteri men mán-jaiyn taldady.
Apparat keńesinde general-leitenant N.Ermekbaev atap ótkendei, Qorǵanys ministrligi Arysta bolǵan órtten keiin bundai oqiǵalardy boldyrmaý úshin keshendi sharalar qabyldaǵan bolatyn. Sondai-aq Qarýly Kúshterde Qarý-jaraq pen oq-dárilerdi saqtaý obektilerin jetildirý boiynsha keshendi jospar júzege asyrylyp, 30 jyl ishinde alǵash ret oq-dárilerge tolyq túgendeý júrgizildi jáne eki saqtaý bazasynyń qurylysy uiymdastyryldy.
«Qabyldanǵan sharalarǵa qaramastan, ministr bergen birqatar tapsyrmalardyń óz deńgeiinde oryndalmaýy Jambyl oblysyndaǵy oqiǵanyń sebebi bolýy da múmkin. Oqiǵanyń shynaiy sebepteri men kinálilerdi tergeý jumystary anyqtaýy tiis», - dedi qorǵanys vedomstvosynyń basshysy.
Oq-dárilerdi saqtaý obektileri rejimdik ekenin eskere otyryp, komissiia jumysyna keńesshiler retinde táýelsiz jáne bilikti sarapshylardy, onyń ishinde Qarýly Kúshterdiń ardagerlerin tartý tapsyryldy.
Komissiia oq-dárilerdiń saqtaý jaǵdaiyna obektivti baǵa berip, barlyq kemshilikterdi anyqtaýǵa jáne olardy joiý jónindegi jumystardy uiymdastyrýǵa yqpal etedi.
Esterińizge sala ketsek, 26 tamyzda saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, joiqyn jarylys boldy. Sońǵy málimet boiynsha, Jambyl oblysyndaǵy jarylystan 15 adam qaza tapqan.
QR Prezidenti Qasym-Jomart Toqaev 29 tamyzdy Jalpyulttyq aza tutý kúni dep jariialady.
27 tamyzda Memleket basshysy Qasym-Jomart Toqaev atalmysh tótenshe jaǵdai boiynsha shuǵyl jinalys ótkizip, vedomstvoaralyq memlekettik komissiia qurýdy tapsyrdy.
Sondai-aq, ol Bas prokýratýra men Ishki ister ministrligine Jambyl oblysyndaǵy oqys oqiǵanyń mán-jaiyn jáne kinálilerdi anyqtaý úshin sotqa deiingi tergeý amaldaryn muqiiat júrgizýdi júktedi.
