«Balaǵa laiyq» mektep dárethanalary men ashanalaryn qadaǵalaý aktsiiasynyń birinshi aptasynda qazaqstandyqtar 65 nysandaǵy sáikessizdikter týraly habarlady. Eske sala keteiik, aktsiia «Mekteptiń jaqsarýyna kómektes!» uranymen ótip jatyr. Birinshi kezeń 2022 jylǵy 27 sáýirde bastalyp, 25 mamyrǵa deiin jalǵasady, dep habarlaidy "Ult aqparat" BǴM baspasóz qyzmetine silteme jasap.
«Birinshi aptada WhatsApp jáne Telegram arnalarymyzǵa 65 nysan boiynsha 400-den astam habarlama, foto jáne beinematerialdar kelip tústi. Ótinishterdiń basym bóligi Túrkistan, Almaty jáne Qaraǵandy oblystarynyń turǵyndarynan tústi. Aktsiia bir apta buryn bastalsa da, oqýshylar men ata-analar sáikessizdikter týraly aqparatty belsendi túrde jiberip jatyr. Kolledjder men ýniversitetterdiń stýdentteri habarlama joldaǵan. Biz túsken ótinishtiń barlyǵyn esepke alamyz. Turǵyndar gigienalyq quraldardyń, jýynatyn bólmelerde qalqalardyń bolmaýy, jyly dárethanalardyń joqtyǵy, salqyn nemese dámsiz taǵamdar jáne t.b. týraly habarlap jatyr. Sonymen qatar olar úlgili, talapqa sai keletin nysandar týraly aqparat jiberip jatqany qýantady. Aita keteiik, aktsiia mektep ákimshiligin jazalaý maqsatynda emes, jaǵdaidy birlesip jaqsartý maqsatynda ótkiziledi. Mektepterdi qarjylandyrý ákimdikterdiń quzyrynda bolǵandyqtan, túsip jatqan aqparattardy solarǵa jiberemiz. Búgingi kúni barlyq eskertýdi joiý boiynsha aimaqtarmen qajetti jumystar júrgizilip jatyr, - dep aitty QR BǴM Balalardyń quqyqtaryn qorǵaý komiteti tóraǵasynyń orynbasary Elina Paýli.
Eske sala keteiik, aktsiiaǵa mektep oqýshylary, eriktiler, balalar ókildigi, muǵalimder, ata-analar, úkimettik emes uiymdardyń ókilderi jáne basqalar qatysa alady.
Sonymen qatar, mektepter men kolledjderde WhatsApp 8 700 699 04 46 jáne Telegram-botqa siltemeleri bar QR-kodtar ornalastyrylady.
