Kóliktegi politsiia qymetkerleri «Nelegal-2021» jedel-aldyn alý is-sharasynyń aiasynda Qazaqstan aýmaǵynda bolý erejelerin buzǵany úshin 107 sheteldikti ákimshilik jaýapkershilikke tartqan, dep habarlaidy "Ult aqparat".
Kóliktegi politsiia departamenti bastyǵynyń birinshi orynbasary Qalijan Qoblandinniń aitýynsha, zań buzǵandardyń 102-si – TMD-nyń, beseýi – alys elderdiń azamattary.
«Shara kezinde Qyzylorda stansasyndaǵy jelilik politsiia bóliminiń qyzmetkerleri «Aqtóbe-Almaty» jolaýshylar poiyzynan Ózbekstan Respýblikasynyń 31 jastaǵy azamatyn ustadi. Onyń ústinen Ákimshilik quqyq buzý týraly kodekstiń 517-babynyń 4-bóligi boiynsha ákimshilik hattama toltyrdy. Qyzylorda qalasynyń mamandandyrylǵan ákimshilik sotynyń sheshimimen quqyq buzýshyǵa 25 AEK kóleminde aiyppul salyndy. Sondai-aq, sot qaýlysymen Qazaqstan Respýblikasynan tys jerlerge 27 sheteldik shyǵaryldy», - deidi Kóliktegi politsiia qyzmetiniń ókili.
Budan bólek quzyrly organǵa sheteldikterdiń el aýmaǵyna ótkeni týraly 3 kún ishinde habarlamaǵany úshin 22 qazaqstandyq ákimshilik jaýapkershilikke tartylǵan.
Qalijan Qoblandin 5-12 shilde aralyǵynda ótken shara kezinde kóshi-qon zańnamasyn buzǵany úshin ustalǵan TMD elderiniń 3 azamaty óz eliniń qabyldaý-taratý ornyna qamalǵanyn aitady.
