Qazaqstan Respýblikasynyń Tuńǵysh Prezidenti – Elbasynyń tóraǵalyǵymen Qazaqstan halqy Assambleiasynyń XXIX sessiiasy ótti, dep habarlaidy "Ult aqparat" Elbasynyń resmi saityna silteme jasap.
Sessiiada sóilegen sózinde Nursultan Nazarbaev 30 jyl buryn kópultty ári kópkonfessiialy Qazaqstan halqy mańyzdy tańdaý jasap, bolashaqqa birlikpen, tatýlyq jáne kelisimmen bet burǵanyn atap ótti.
– Bul bizge memlekettiligimizdi qurýǵa qolaily jaǵdai jasap, Qazaqstannyń qazirgi kelbetin qalyptastyrýǵa qajetti mol resýrspen qamtamasyz etti. «Biz, ortaq tarihi taǵdyr biriktirgen Qazaqstan halqy» dep bastalatyn elimizdiń Konstitýtsiiasy oǵan negiz boldy, – dedi Qazaqstannyń Tuńǵysh Prezidenti.
Nursultan Nazarbaev elimizdiń áleýmettik-ekonomikalyq damýy men halyqtyń turmysyn jaqsartýdaǵy jetistikterin aitty.
– Qazirgi naryqtyq ekonomikany jańadan qurdyq, irgeli reformalar tabysty júzege asty. Sonyń arqasynda Qazaqstan álemdegi damyǵan 50 memlekettiń jáne tabys deńgeii ortashadan joǵary elderdiń qataryna qosyldy. Elimiz jahandyq ulttar qoǵamdastyǵynyń bedeldi ári senimdi múshesine ainaldy – kók týymyz Birikken Ulttar Uiymynyń shtab-páterinde jelbirep tur. Biz halyqaralyq arenada ózimizdiń ulttyq múddelerimiz ben basymdyqtarymyzdy júieli túrde qorǵap kelemiz. Qazaqstannyń memlekettik shekarasy zań júzinde bekitilip, ony álemniń barlyq elderi moiyndady, – dedi Qazaqstannyń Tuńǵysh Prezidenti.
Elbasy Qazaqstannyń iadrolyq qarýsyzdaný jáne ony taratpaý salasyndaǵy kóshbasshylyǵy álemdik qoǵamdastyqqa adamgershiliktiń jańa standartyn ákelgenin atap ótti. Sonymen qatar elimiz bastamashy bolǵan Eýraziia ekonomikalyq odaǵy, Aziiadaǵy ózara yqpaldastyq jáne senim sharalary keńesi, Túrki keńesi, Álemdik jáne dástúrli dinder liderleriniń sezi siiaqty integratsiialyq jobalarǵa erekshe nazar aýdaryldy.
– Kópvektorly saiasattyń arqasynda biz yntymaqtastyq pen tatýlyqty qamtamasyz etýge bet burǵan beibitsúigish ult retinde tanyldyq. Táýelsizdik Qazaqstan úshin ádildik ornaǵan aitýly kezeńge ainaldy. Óz taǵdyryn óz qolyna alǵan qazaq halqy ulttyq rýhy men tól tarihyn qaita túletti. Biz Uly dala mádeni murasynyń baǵa jetpes qazynasyn jandandyryp, álem jurtshylyǵyna usyndyq. Ol barsha adamzat igiliginiń ajyramas bóligine ainaldy. Munyń bári tarihi máni zor oqiǵa ekeni anyq. Eki jyldan astam ýaqyt ishinde boi kótergen Túrkistan qalasy elimizdiń zor múmkindikteriniń taǵy bir aiǵaǵy boldy, – dedi Nursultan Nazarbaev.
Qazaqstannyń Tuńǵysh Prezidenti búginde Qazaqstan jaýapty jańa kezeńge aiaq basqanyn atap ótti. Bul pandemiia men jahandyq ekonomikadaǵy daǵdarys qubylystary kúsheigen, sondai-aq álemdik kóshbasshy elderdiń geosaiasi básekeci shielenisken kezeńmen tuspa-tus kelip otyr.
– Osy jáne basqa da qolaisyz jaǵdailar memleketimizdiń damýyna teris áserin tigizbei qoimaidy. Bul oraida el Prezidenti Qasym-Jomart Toqaev jan-jaqty oilastyrylǵan syndarly saiasat júrgizip jatqanyna senimdimin. Muny bárimiz qoldaýǵa tiispiz. Ol barlyq qazaqstandyqtardyń múddesine jáne ultymyzdy odan ári damytý maqsattaryna qyzmet etedi, – dedi Elbasy.
Nursultan Nazarbaev óz sózinde aldaǵy ýaqytta memlekettik saiasat pen ulttyq tutastyqtyń berik arqaýy bolýǵa tiis bes qaǵidatqa erekshe nazar aýdardy. Ol: memleket pen halyq arasyndaǵy senimge jáne ózara is-áreketke negizdelgen qazaqstandyq patriotizm qaǵidaty; azamattardyń quqyqtarynyń teńdigi qaǵidaty; memlekettik til – qazaq tiliniń biriktirýshi róli qaǵidaty; mádenietter alýandyǵymen sabaqtasatyn «Alýan túrliliktiń birligi» qaǵidaty; ulttyń úzdiksiz jańǵyrýy qaǵidaty.
– Assambleia aldaǵy jumys strategiiasyn aiqyndaǵanda osy qaǵidattardy negizge alýy kerek. Sondai-aq qoǵamdyq damýdyń pármendi institýty retinde jańa jaǵdaiǵa orai uiym qyzmetiniń tiimdiligin arttyrý sharalaryn qabyldaý qajet. Assambleia institýttary elimizdegi etnosaralyq kelisimge nuqsan keltirýi yqtimal kez kelgen syn-qaterge toitarys berýge árdaiym ázir bolýǵa tiis, – dedi Qazaqstannyń Tuńǵysh Prezidenti.
– Osy jyldar ishinde men árdaiym halyqtyń tatýlyǵyn, baqýat ári úilesimdi ómirin, elimizdiń qaýipsizdigin, turaqtylyq pen tynyshtyqty basty orynǵa qoidym. Soǵys, dini jáne etnosaralyq qaqtyǵystar halqymyzdyń tynysh ómirine qaýip tóndirmeýin, bizdiń baitaq Otanymyz beibitshiliktiń qutty mekeni bolǵanyn qaladym. Búginde sol armanym oryndaldy. Oǵan 1995 jyly meniń bastamammen qurylǵan Qazaqstan halqy Assambleiasynyń da qosqan úlesi qomaqty, – dedi Nursultan Nazarbaev.
Qazaqstannyń Tuńǵysh Prezidenti halqymyzdyń baqýat ómir súrip, eńbek etip, bolashaǵyn quryp jatqany tatýlyq pen kelisimniń arqasy ekenin atap ótti.
– Eń bastysy – jetken jetistikterimizdi kózdiń qarashyǵyndai qorǵai bilýimiz kerek. Barshamyz búkil qoǵamnyń múddesi jolynda jumyla bilsek qana elimizdegi turaqtylyq pen birlikti saqtap qalamyz. Biz Qazaqstan qoǵamynyń syrtqy kúshterdiń áserinen shaiqalýyna jol bermeýimiz kerek, – dedi Elbasy.
Sońynda Nursultan Nazarbaev Assambleianyń barsha múshelerine uiymnyń eldi damytý baǵytyna udaiy qoldaý kórsetkeni úshin alǵys aitty.
– «Qazaqstan Respýblikasynyń Tuńǵysh Prezidenti – Elbasy týraly» konstitýtsiialyq zańǵa jáne «Qazaqstan halqy Assambleiasy týraly» Zańǵa sáikes meniń Qazaqstan halqy Assambleiasyn ómir boiy basqarýǵa quqyǵym bar ekenin bilesizder. Bul rette Assambleiany basqarýdyń birqatar ókilettikteri el Prezidentiniń quzyrynda. Qazaqstan halqy Assambleiasy Memleket basshysynyń mańyna toptasyp, oǵan tirek bolýy kerek. Sondyqtan men Qazaqstan halqy Assambleiasyn basqarý quqyǵyn Prezident Qasym-Jomart Kemeluly Toqaevqa berýdi uiǵardym. Bul sheshim Assambleianyń múddesine sai kelip, Qasym-Jomart Kemeluly Toqaevqa barlyq jumysty, sondai-aq halqymyzdyń, qoǵamymyz ben memleketimizdiń bolashaǵyna qatysty barlyq josparlardy júieli qurýǵa kómektesedi dep kámil senemin, – dedi Qazaqstannyń Tuńǵysh Prezidenti.
Óz kezeginde Qazaqstan Prezidenti Qasym-Jomart Toqaev Nursultan Nazarbaevqa «Qazaqstan halqy Assambleiasynyń Qurmetti Tóraǵasy» mártebesin berýdi usyndy.
– Qurmetti Nursultan Ábishuly, Assambleianyń Qurmetti Tóraǵasy bolý jónindegi bizdiń ortaq usynysymyzdy qabyl alýyńyzdy suraimyz. Bul mártebe halqymyz ben memleketimizdiń aldyndaǵy tarihi eńbegińiz úshin Sizge laiyq. Assambleianyń barlyq músheleri bul usynysty qoldaitynyna senimdimin, – dedi Memleket basshysy.
