Astanada Qazaqstan Prezidenti Nursultan Nazarbaevtyń qatysýymen «Nur Otan» partiiasy Saiasi keńesiniń keńeitilgen otyrysy bastaldy, dep habarlaidy QazAqparat tilshisi.
Otyrys elordadaǵy Táýelsizdik saraiynda ótip jatyr. Shara barysynda «Nur Otan» partiiasyn júieli túrde jańǵyrtý boiynsha jumys barysy talqylanady. Sonymen qatar, Qazaqstan Prezidentiniń Bes áleýmettik bastamasyn júzege asyrý baǵytynda qoǵamdyq baqylaýdy uiymdastyrý máseleleri qaralmaq. Jiynǵa Parlament depýtattary, Úkimet jáne jergilikti atqarýshy organdardyń músheleri qatysýda.
«Nur Otan» partiiasy Saiasi keńesiniń otyrysy tek Memleket basshysy-partiia Tóraǵasynyń nemese Saiasi biýronyń shaqyrtýymen jylyna bir ret uiymdastyrylady. 2017 jyly 3 qarashada ótken jiynda Memleket basshysy partiiany júieli túrde jańǵyrtý máselelesin aldyńǵy qatarǵa qoiǵan edi.
Eske sala ketsek, ótken jyldyń jeltoqsanynda Saiasi keńes biýrosynyń qaýlysymen partiiany jańǵyrtýdyń naqty jospary bekitilgen bolatyn. Onda jeti baǵyt boiynsha sharalardy iske asyrý, atap aitqanda, partiialyq kadrlarmen jumysty kúsheitý, jergilikti ókildik organdarynda partiianyń rólin arttyrý, onyń jalpyulttyq kún tártibin qurýda belsendi túrde aralasýyn qamtý, partiialyq tehnologiialardy jetildirý, jastarmen belsendi jumys júrgizý, analitikalyq áleýetti ósirý men partiialyq bilim sapasyn arttyrý qarastyrylǵan edi.
