Elbasynyń atyna Elorda kúni men Qazaqstannyń Tuńǵysh Prezidentiniń 80 jyldyq mereitoiyna orai kelip jatqan jedelhattar men hattar legi jalǵasýda, dep habarlaidy "Ult aqparat" Elbasynyń resmi saityna silteme jasap.
Belarýs Respýblikasynyń Prezidenti qazirgi Qazaqstannyń tarihy, onyń jetistikteri men halyqaralyq bedeli Nursultan Nazarbaevtyń atymen tyǵyz bailanysty ekendigin atap ótti.
«Sizdiń tikelei basshylyǵyńyzben Qazaqstan halqy áleýmettik-ekonomikalyq damýda tolaǵai tabystarǵa qol jetkizdi, álemdik arenada laiyqty bedelge ie bolǵan memleket quryp, úlken joldy júrip ótti.
Belarýs Respýblikasynda Sizdiń belorýstar men qazaqtardyń tarihi dostyǵyna, ózara qurmetke, senim men qoldaýǵa negizdelgen keń aýqymdy ekijaqty qatynastardy qurýǵa qosqan zor úlesińizdi joǵary baǵalaidy», - delingen A.Lýkashenkonyń jedelhatynda.
Grýziia Prezidenti Salome Zýrabishvili Elbasyna densaýlyq, baqyt pen tabys tiledi.
«Qazaqstan Respýblikasynyń memlekettik táýelsizdigin qalyptastyrý jáne nyǵaitý kezeńi Sizdiń atyńyzben tyǵyz bailanysty. Siz Tuńǵysh Prezident retinde batyl sheshim qabyldap jáne kóregen saiasat júrgize otyryp, eldiń derbes damýyn jáne halyqtyń ál-aýqatynyń ósýin qamtamasyz etip, aýqymdy reformalardy júzege asyrý úshin berik negiz qaladyńyz. Sondai-aq Qazaqstannyń halyqaralyq bedelge qol jetkizýine yqpal ettińiz», - delingen Grýziia Prezidentiniń jedelhatynda.
Avstriia Respýblikasynyń Federaldyq Prezidenti Aleksandr Van der Bellenóziniń hatynda Nursultan Nazarbaevtyń Qazaqstannyń halyqaralyq bedelin nyǵaitýdaǵy jáne qurlyqtaǵy integratsiialyq úderisterdi damytýdaǵy erekshe rólin atap ótti.
Horvatiia Respýblikasynyń Prezidenti Zoran Milovich, Indoneziia Respýblikasynyń Prezidenti Djoko Vidodo, Singapýr Respýblikasynyń Prezidenti Halima Iakýb, Serra-Leone Respýblikasynyń Prezidenti Djýliýs Maada Bio Elbasyna jáne kúlli Qazaqstan halqyna myqty densaýlyq pen baq-bereke tiledi. Sondai-aq barlyq maqsattarǵa jetýine jáne ósip-órkendei berýine tilektestik bildirip, jyly lebizderin joldady.
Japoniia Premer-Ministri Sindzo Abe Qazaqstannyń Tuńǵysh Prezidentine eki el arasynda yntymaqtastyq ornatýǵa jáne damytýǵa qosqan úlesi úshin alǵysyn bildirdi.
«Sizdi 80 jyldyq mereitoiyńyzben shyn júrekten quttyqtaimyn. Ekeýmizdiń aramyzdaǵy jeke senimge negizdelgen Japoniia men Qazaqstannyń ózara tiimdi seriktestigi sátti damyp kele jatqanyna qýanyshtymyn. Ótken jyldyń qazan aiynda mártebeli Imperatordyń taqqa otyrý rásimine qatysqanyńyz úshin Sizge taǵy da alǵys aitamyn. Sol mańyzdy kúni Ózińizben bolǵan kezdesý ekijaqty qatynastarǵa jańa serpin berdi», - delingen Sindzo Abeniń jedelhatynda.
Vengriia Premer-Ministri Viktor Orban Nursultan Nazarbaevtyń táýelsiz Qazaqstannyń berik negizin qalaǵanyn atap ótti.
«Siz HHI ǵasyrdyń halyqaralyq saiasatyn jáne jańa álemdik tártipti túsinip qana qoimai, ony óz halqyńyzdyń igiligi jolynda qalai baǵyttaý kerektigin biletin tulǵasyz. Sondyqtan Sizdi ózime rýhani jaqyn kóshbasshy sanaimyn. Men únemi bizdiń áńgimelerimizdi jyly sezimmen eske alamyn», - dep jazdy V.Orban.
Sondai-aq Kanadanyń general-gýbernatory Djýli Paiett pen Singapýrdyń Premer-Ministri Li Sian Lýn da quttyqtaý hattarynda tolaǵai tabys pen jańa belester tiledi.
