Prezident bastamalarynyń árqaisysy halyqtyń kókeiinde júrgen eń mańyzdy máselelerdi qamtidy. Bul týraly Úkimet otyrysynda QR Premer-Ministri Baqytjan Saǵyntaev aitty, dep habarlaidy "Ult Aqparat" QazAqparatqa silteme jasap.
«Ózderińizge málim, keshe Elbasy halyqqa áleýmettik baǵdarlamalaryn jariia etip, Úkimetke naqty mindetter júktedi. Bul bastamalardyń árqaisysy búgingi tańda halyqtyń kókeiinde júrgen eń mańyzdy máselelerdi qamtidy. Qarapaiym azamattarǵa arnalǵan arzan ipoteka, tabysy tómen jumyskerlerge salynatyn salyqty azaitý, joǵary bilim salasyna qosymsha 20 myń grant bólip, eń kemi 75 myń oryndyq stýdentterge jataqhana salý, shaǵyn jáne orta bizneske nesie kólemin 20 mlrd teńgege arttyrý, soltústik óńirlerge gaz tartý - bulardyń qai-qaisysy da halyqtyń áleýmettik ómirine túbegeili ózgerister alyp keletin asa mańyzdy jumystar», - dedi Premer-Ministr.
Úkimet basshysynyń atap ótýinshe, gúldegen memleket degen tiimdi basqarý júiesi men qýatty ekonomika ǵana emes. Ol - eń aldymen rýhani kemel jáne áleýmettik jaǵynan barynsha qorǵalǵan azamattar.
«Iaǵni, Elbasy byltyr «Rýhani jańǵyrý» baǵdarlamasyn bastap berse, biyl áleýmettik jańǵyrýdyń aýqymdy sharalaryn usyndy. 5 áleýmettik bastama Elbasynyń halqyna jasaǵan janashyrlyǵynyń aiqyn kórinisi. Bastamalaryn arnaiy úndeý arqyly jariialap, onda qazaqstandyqtarǵa shynaiy alǵysyn bildirýi onyń mańyzdylyǵyn arttyra túsedi. Bul Elbasynyń halqyna usynǵan perzenttik ári prezidenttik syiy. Qashanda halqynyń jan-dúniesine tereń boilap, eliniń júregindegi armanyn tamyryn tapqandai dóp basatyn Elbasynyń bastamalaryn múltiksiz júzege asyryp, tiianaqty oryndaý bárimizge syn. Sondyqtan da biz bar kúsh-jigerimizdi jumyldyryp, Elbasy júktegen, el kútken múddeden shyǵa bilýge tiispiz», - dedi Baqytjan Saǵyntaev.
