Nursultan Nazarbaev Qazaqstan halqy Assambleiasy Tóraǵasynyń orynbasary Janseiit Túimebaevty qabyldady, dep habarlaidy "Ult aqparat" elbasy.kz saityna silteme jasap.
Kezdesý barysynda Elbasyna Qazaqstan halqy Assambleiasynyń jáne óńirlik Dostyq úileriniń jumys josparynyń oryndalýy týraly aqparat usynyldy.
«1995 jyly biz kópultty memleketimizdiń barlyq azamattarynyń quqyqtaryn qorǵaý úshin Qazaqstan halqy Assambleiasyn qurdyq. Keiin Assambleia konstitýtsiialyq organǵa ainaldy. Táýelsizdiktiń alǵashqy kúnderinen bastap biz únemi elimizdegi barlyq etnos ókilderiniń teńdigin qamtamasyz ettik», - dedi Qazaqstannyń Tuńǵysh Prezidenti.
Elbasy Qazaqstan halqy Assambleiasynyń apparaty mádeni jáne oiyn-saýyq is-sharalarǵa emes, eń aldymen saraptamalyq jumystarǵa basa mán berýi kerektigin atap ótti.
«Biz 30 jyldyń ishinde qazaqstandyqtardyń birligi men tutastyǵynyń arqasynda búgingi jetistikterge qol jetkizdik. Kópultty memleket bolýymyz – bizdiń artyqshylyǵymyz», - dedi Qazaqstan halqy Assambleiasynyń Tóraǵasy.
Nursultan Nazarbaev Qazaqstan halqy Assambleiasy apparaty men óńirlik ókildikteriniń qyzmetin jandandyrý úshin aýdit ótkizýdi tapsyrdy.
Óz kezeginde, J.Túimebaev Assambleianyń ǵylymi-saraptamalyq qyzmetin kúsheitý jáne etnosaralyq qatynastar salasynda zertteýler júrgizý boiynsha qabyldanǵan sharalar týraly baiandady.
Kezdesý sońynda Qazaqstannyń Tuńǵysh Prezidenti birqatar naqty tapsyrma berdi.
