Qazaqstan Respýblikasynyń Prezidenti Nursultan Nazarbaev telekópir arqyly Túrkistan qalasyndaǵy Túie sútin óńdeitin «GOLDEN CAMEL GROUP LTD» zaýytyn saltanatty túrde iske qosty. Kásiporynnyń ashylý rásimine Túrkistan oblysynyń ákimi Janseiit Túimebaev pen zaýyt direktory Iang Dji qatysty.
«Bizdiń kásiporyn túie jáne bie sútin untaq kúiinde óndiretin elimizdegi biregei joba. Ónimniń 90 paiyzy shetelge eksporttalatyn bolady. Joba Túrkistan, Qyzylorda, Jambyl oblystarynda mal basyn kóbeitip, túie sharýashylyǵynyń damýyna septigin tigizedi. Bizdiń joba Qazaqstan men Qytai arasyndaǵy ózara tiimdi seriktestiktiń dáleli. Qadirli Elbasy, investorlarǵa kórsetken qoldaýyńyz úshin Sizge alǵys bildirip, qos zaýytymyzdyń eksporttyq ónimderin jóneltýge ruqsat berińiz», – dedi Iang Dji.
Atalǵan joba Qytai Halyq Respýblikasy men Qazaqstan Respýblikasynyń arasyndaǵy yntymaqtastyq memorandým negizinde qurylǵan. Sondai-aq, 2015-2019 jyldarǵa arnalǵan Indýstrialdy-innovatsiialyq damý baǵdarlamasy sheńberinde iske asyrýǵa josparlanǵan 51 jobanyń biri. 10 gektar aýmaqty alyp jatqan seriktestik jylyna 2 500 tonna túie sútin óńdeýge qaýqarly. Joba jalpy quny 7,45 mlrd. teńgeni quraidy. Zavodta 85 adam jumyspen qamtylǵan.
Aita keteiik, munda túie sútinen diabetpen aýyratyndarǵa arnalǵan tabletka, kosmetika, túrli dámmen jasalǵan iogýrttar, qurǵaq tabletkalar óndiriletin bolady.
