Qazaqstannyń Tuńǵysh Prezidenti – Elbasy Nursultan Nazarbaevtyń tóraǵalyǵymen «Samuryq-Qazyna» ulttyq ál-aýqat qoryn basqarý jónindegi keńestiń otyrysy ótti, dep habarlaidy elbasy.kz.
Keńeste «Samuryq-Qazyna» aktsionerlik qoǵamynyń qazirgi qyzmeti, shaǵyn jáne orta biznesti qoldaý boiynsha qabyldanyp jatqan sharalar, sondai-aq keńestiń ótken otyrysynda berilgen tapsyrmalardyń oryndalý barysy qaraldy.
Otyrysty ashqan Nursultan Nazarbaev «Samuryq-Qazyna» qory el damýynda mańyzy ról atqaratynyn atap ótti.
– Biyl biz aýyr synaqtarǵa tap boldyq. Koronavirýs pandemiiasy jahandyq ekonomikalyq daǵdarysqa ákep soqty. Álemdik ekonomika men saýda ósimi toqtady. Bul faktorlardyń barlyǵy bizdiń ekonomikamyzǵa keri áserin tigizip otyr. Osy oraida biz qalyptasqan kúrdeli ahýalǵa tez beiimdelýge jáne daǵdarysty eńserýge septigin tigizetin ekonomikanyń negizgi draiverlerin aiqyndaýǵa tiispiz, - dedi Elbasy.
Qazaqstannyń Tuńǵysh Prezidenti memlekettiń ekonomikalyq ósimdi qalpyna keltirý sharalaryn der kezinde qabyldaǵanyna jáne mańyzdylyǵyna toqtaldy.
– Ekonomikamyzdy qalpyna keltirýde jáne ári qarai damytýda ulttyq ál-aýqat qory basty ról atqarady. Qazaqstannyń barlyq negizgi kompaniialary osy Qordyń quramyna kiredi. Qor kompaniialarynyń jiyntyq aktivteri 28 trln teńgeni quraidy. Bul – JIÓ-niń 40%-y. Munda 300 myń qyzmetker jumys isteidi. Qiyndyqtarǵa qaramastan kompaniialardyń bári jumysyn jalǵastyryp jatyr. Ótken jylǵy Qor kórsetkishteriniń ósý qarqyny biylǵa rezerv qurýǵa múmkindik bergenin baiqap otyrmyz, - dedi Nursultan Nazarbaev.
Jiyn barysynda QR Premer-Ministri A.Maminnyń, «Samuryq-Qazyna» ulttyq ál-aýqat qory» aktsionerlik qoǵamynyń basqarma tóraǵasy A.Esimovtiń, «Qazmunaigaz» ulttyq kompaniiasy» aktsionerlik qoǵamynyń basqarma tóraǵasy A.Aidarbaevtyń, «Qazaqstan temir joly» ulttyq kompaniiasy» aktsionerlik qoǵamynyń basqarma tóraǵasy S.Myńbaevtyń baiandamalary tyńdaldy.
Elbasy Qor kompaniialarynyń tiimdiligin ári qarai arttyrý úshin naqty sharalar qabyldaýdyń mańyzdylyǵyn atap ótti.
Sonymen qatar Qazaqstannyń Tuńǵysh Prezidenti qor kompaniialaryn jekeshelendirý máselelerine, satyp alýlar jáne otandyq taýaróndirýshilerdi qoldaýda jergilikti úlesti arttyrý boiynsha qabyldanyp jatqan sharalarǵa toqtaldy.
Keńes qorytyndysy boiynsha Elbasy «Samuryq-Qazyna» basshylyǵynyń daǵdarysqa qarsy qabyldaǵan sharalarynyń nátijesin atap ótip, bul tájiribeni basqa da qurylymdarda qoldanýdyń mańyzdylyǵyna toqtaldy.
– Qor basshylyǵy der kezinde qabyldaǵan sharalardy qoldaimyn jáne oń baǵalaimyn. Olar óz tiimdiligin kórsetti. Daǵdarys kezinde memleket ekonomikany qoldaý úshin Ulttyq qordan qyrýar qarjy bóldi. Alaida osy jaǵdaida «Samuryq-Qazyna», kerisinshe, Ulttyq qorǵa 100 mlrd. teńge baǵyttady, - dedi Qazaqstannyń Tuńǵysh Prezidenti.
