Keshe, 4 aqpan kúni Qazaqstan Respýblikasynyń Prezidenti N.Nazarbaevtyń Konstitýtsiialyq keńeske QR Konstitýtsiiasynyń 42-babynyń 3-tarmaǵyna resmi túsindirme berý týraly ótinishi jariialandy. Osy derekke bailanysty qoǵamda, ásirese áleýmettik jelilerde túrli boljamdar men kertartpa áńgimeler oryn ala bastaýynyń aldyn alý úshin Elbasy halyqqa túsindirý málimdemesin jasady. Onda mundai ótinishter, iaǵni týyndaǵan suraqtar boiynsha Konstitýtsiialyq keńeske onyń qurylǵan merzimi 1995 jyldan beri 220 ótinish jasalǵany, onyń ishinde 20-ǵa jýyǵy Prezidenttiń jeke ótinishimen bolǵany atap ótildi.
Konstitýtsiialyq keńes elimizdiń Ata zańynyń normalaryna resmi túsinik beretin organ bolǵandyqtan, qajettilik oryn alǵan jaǵdaida QR Konstitýtsiiasyna sáikes Prezident, Senat jáne Májilis tóraǵalary, Premer-ministr, Parlament depýtattarynyń jalpy sanynyń besten birinen kem emesi ótinish bildire alady.
Aita keterligi, prezidenttik respýblikalar mysalynda osy tárizdes Konstitýtsiialyq keńeske ótinish bildirý qalypty jaǵdai. Batys memleketterinde konstitýtsiialyq baqylaý organdary qurylǵan. AQSh-ta bul fýnktsiiany Joǵarǵy sot oryndaidy, Frantsiiada – Konstitýtsiialyq keńes, Germaniiada – Federaldy konstitýtsiialyq sot, Ispaniiada – Konstitýtsiialyq tribýna jáne t.b. Konstitýtsiialyq baqylaý institýty mańyzdy demokratiialyq institýt bolyp tabylady. Onyń durys qyzmet jasaýy Ata zańnyń saqtalýyn jáne saiasi turaqtylyqty qamtamasyz etedi, qoǵamdaǵy túrli toptardyń qarym-qatynasyn retteidi. Atalǵan memleketterde Konstitýtsiia nemese zań normalaryna bailanysty suraq týyndaǵan jaǵdaida konstitýtsiialyq baqylaý organdaryna ótinish bildirý arqyly kez-kelgen másele boiynsha túsinik alý – saiasi júieniń kúndelikti qalypty jaǵdaiy retinde qabyldanady.
Basty nazarda ustaityn másele – Elbasy ótinishiniń astarynda tranzit máselesi, iaǵni bilikti berý, bolmasa merziminen buryn prezidenttik sailaý ótkizý turmaǵandyǵy. Qazirgi aqparattyq qoǵam jaǵdaiynda aǵymdaǵy máselelerge jan-jaqty taldaý jasaý arqyly qorytyndy shyǵarý bilimdilikti, saiasi saýattylyqty talap etedi. Sol sebepti bolyp jatqan saiasi úderisterge baiyppen qaraǵan abzal bolar edi.
Ásel Nazarbetova,
QR Prezidenti janyndaǵy QSZI halyqaralyq zertteýler bóliminiń basshysy
