Nur-Sultan qalasynyń ákimi Altai Kólginov Elbasynyń úndeýine qatysty pikir bildirdi, dep habarlaidy "Ult aqparat".
«Táýelsiz elimiz ben bas qalamyzdyń negizin qalaýshy, Elbasy Nursultan Ábishuly Nazarbaev qazaqstandyqtarǵa Úndeý joldady. Budan da qiyn kezeńde, tipti aýyr jaǵdaida el tizginin qolyna alǵan Tuńǵysh Prezidentimiz halqymyzdyń myǵym birligimen dúniedegi birneshe daǵdarystan aman alyp shyǵyp, memleketimizdi órkenietti elder qataryna qosqanyn eshqashan esten shyǵarǵan emespiz. Ekonomikalyq, áleýmettik basqa da túrli daǵdarysty halyqpen birge júrip eńsergen Elbasymyzdyń tájiribesi – bárimiz úshin sabaq. Úndeýde eńbek oryndaryn saqtap, azamattardy jumystan shyǵarmaý týraly da aityldy Bul degenimiz – jaǵdaidy tereń túsine otyryp tanytqan úlken janashyrlyq», - dedi qala ákimi óziniń áleýmettik jelidegi paraqshasynda.
Altai Kólginov Memleket basshysy Qasym-Jomart Toqaevtyń tapsyrmasyna sáikes, qaladaǵy mekeme basshylarymen kelise otyryp, jumys oryndaryn saqtap, qashyqtan jumys isteýdi uiymdastyrǵanyn jetkizdi.
«Álemdi sharpyǵan indet ókinishke qarai, bizdiń elimizdi de ainalyp ótpedi. Úkimettiń, ákimdiktiń ózara aldyn ala ázirlegen daiyndyǵynyń jáne qazirgi kezde atqaryp jatqan jankeshti jumystarynyń arqasynda jaǵdaidy qatań baqylaýǵa múmkindik týyp otyr. Qala karantinge jabyldy. Biraq turǵyndarǵa qajetti azyq-túlik, basqa da turmysqa qajetti taýarlardyń úzdiksiz kirýine kedergi joq. Sondyqtan azyq-túlik dúkenderinde únemi tamaq bolady. Qanaǵat qaryn toidyrady deidi. Ózge elderdegidei japatarmaǵai azyq taýarlaryn kóshirip alyp ketýge de esh negiz joq. Elbasy osyndai qiyn kezeńde birinshi bolyp qoǵamǵa úlgi kórsetti. Tuńǵysh Prezident Qory esebinen 200 million, «Nur Otan» partiiasynyń jobalary aiasynda 150 million teńge bóldi. Túsken qarajat karantin jariialanǵan qalalardaǵy áleýmettik jaǵdaiy tómen azamattarǵa ataýly kómek kórsetýge jumsalyp jatyr. Qazirdiń ózinde ulttyq biznes ókilderiniń el-jurtqa kórsetip jatqan kómegi úshin rizashylyǵyn bildirgen Úndeý iesi: «mundai márttik jalǵasyn taýyp, oǵan qosylatyn biznes ókilderiniń sany kóbeie túsedi degen úmittemin. Elordalyq biznes ókilderi de qoldarynan kelgenshe azamattarǵa kómek qolyn sozyp, qiyn sátte birlik tanytyp jatyr», - dedi ol.
Sonymen qatar, ákim úndeýde usynylǵandai qalada arnaiy qor ashylǵanyn jetkizdi.
«Oǵan túsken qarjy muqtaj azamattarǵa, áleýmettik osal toptarǵa beriledi. Sonymen qatar koronavirýs infektsiiasyn juqtyrǵan azamattardy kúni-túni emdep úi betin kórmei júrgen meditsinalyq qyzmetkerlerge ústemaqy retinde beriledi. Memlekettiń jyldar boiy jinaǵan qory jetkilikti. Daǵdarystar kezinde biznesti saýyqtyrý úshin árdaiym qoldaý jasap keledi. Qazir de kóp kómek kórsetilip jatyr. Alaida osyndai, biznestiń áleýmettik jaýapkershiligi synalatyn sátte halyqqa kómek kórsetip jatqan kompaniia basshylaryna, mekemelerge, jekelegen azamattarǵa rahmetimdi aitamyn. Qazir bárimizdiń maqsat-múddemiz bireý ǵana. Ol – tutas el ekenimizdi tanytyp, tosynnan kelgen synaq kezinde judyryqtai jumylýymyz. Jáne ol bizdiń qolymyzdan keledi. Birligimiz ben sabyrymyz synalǵan talai qiynshylyqty birge jeńgenbiz. Oǵan kári tarih qanshama ret kýá bolǵan. Ol úshin shyn muqtaj azamattarǵa osyndaida qoldaý qajet. Sondyqtan, arnaiy qor ashylǵanyn habarlap, is basynda júrgen qalamyzdyń kásipkerlerin osy synaqta bir jeńnen qol, bir jaǵadan bas shyǵaryp qoldaýǵa shaqyramyn. Biz birgemiz!» - dep tolyqtyrdy A. Kólginov.
Eske salsaq, Qazaqstannyń Tuńǵysh Prezidenti Nursultan Nazarbaev Qazaqstan halqyna úndeý joldaǵan bolatyn.
.jpeg)