Elbasy Nur Otan partiiasy Tóraǵasynyń birinshi orynbasary Baýyrjan Baibekti qabyldady, dep habarlaidy "Ult aqparat" elbasy.kz-ke silteme jasap.
Kezdesý barysynda Qazaqstannyń Tuńǵysh Prezidentine «Birgemiz» qorynyń qazirgi qyzmeti jáne partiia músheleri arasyndaǵy irikteý jumystaryna daiyndyq – praimeriz týraly málimet berildi.
Usynylǵan aqparatqa sáikes, «Birgemiz» qorynyń qarajaty esebinen 360 myńnan astam otbasyǵa 50 myń teńge kóleminde birjolǵy kómek kórsetilip, 240 myń otbasyǵa qajetti azyq-túlik jetkizildi. Budan bólek elordanyń jáne Almaty qalasynyń meditsinalyq mekemelerinde jumys isteitin 2100-den astam qyzmetkerge birjolǵy tólem jasaldy.
Sondai-aq «Birgemiz» qorynyń qarajatynan Maqtaaral aýdany Dostyq aýylynyń turǵyndaryna baspana salý maqsatynda 340 million teńge bólindi. Sonymen qatar partiia belsendileri men eriktileri bir myń tonnadan astam gýmanitarlyq kómek jinap, zardap shekken eldi mekenderdiń turǵyndaryna jiberdi.
Atqarylyp jatqan jumystyń mańyzdylyǵyn aita kele, Elbasy «Birgemiz» qory arqyly elimizdiń shaǵyn qalalary men aýyldaryndaǵy muqtaj adamdarǵa qoldaý kórsetýdi jalǵastyrýdy tapsyrdy.
– Tótenshe jaǵdai kezinde «Jas Otan» búkil el boiynsha bes myńnan astam eriktini jumyldyrdy. Olar demalyssyz jumys istep, muqtaj adamdarǵa kómek jetkizdi. Naǵyz patriottardyń, jaýapkershiligi mol jas kóshbasshylardyń jańa býyny qalyptasqany qýantady. Olardyń eń belsendilerine arnalǵan alǵys hattarǵa qol qoidym, - dedi Nursultan Nazarbaev.
Qazaqstannyń Tuńǵysh Prezidenti halyqtyń partiiaǵa degen senimin nyǵaitý jumysyn jalǵastyrýdy tapsyrdy.
– «Nur Otan» – naqty ister partiiasy. Men qoǵamdyq qabyldaýlarǵa kelip túsken hattardyń sany jeti ese ulǵaiǵanyn jáne sheshilgen máselelerdiń de artyp kele jatqanyn kórip otyrmyn. Bul halyqtyń partiiaǵa degen seniminiń kórinisi. Osy jumysty odan ári kúsheitý kerek, - dedi Elbasy.
Kezdesý barysynda B.Baibek Elbasyna óńirlerge jasaǵan jumys saparlarynyń nátijeleri, partiianyń sailaýaldy baǵdarlamasynyń oryndalý barysy jáne praimerizge daiyndyq týraly baiandady.
– Qazirgi tańda 10 myń partiia múshesinen quralǵan kadrlyq rezerv jasaqtaldy. Praimeriz erejeleri áielder men jastarǵa arnalǵan kvotalardy eskere otyryp bekitildi. Partiia óz músheleri arasyndaǵy irikteýdi ekinshi jartyjyldyqqa josparlap otyr», - dedi «Nur Otan» partiiasy Tóraǵasynyń birinshi orynbasary.
