Búgin Parlament palatalarynyń birlesken otyrysynda Qazaqstan Prezidenti Nursultan Nazarbaev elimizde engizilip jatqan Meditsinalyq saqtandyrý júiesiniń tolyq jetilmegenin aitty. Elbasy 3 mln-ǵa jýyq ózin-ózi jumyspen qamtyǵandar sanatyna kimderdiń jatatynyn anyqtaýdy tapsyrdy. Baq.kz tilshisiniń málimetinshe, olar keler jyldan bastap saqtandyrý jarnasyn tóleýi tiis.
«Búkil álemde saqtandyrý júiesi jaqsy damyǵan. Bizdiń elde de saqtandyrý salasyn damytyp, saqtandyrý qyzmetteriniń qoljetimdilik deńgeiin arttyrý qajet. Men bul jerde meditsinalyq saqtandyrý jaily aita ketkim keledi. Bul progressivti baǵyt. Degenmen, EYDU uiymyna múshe elderdiń ishinde altaýy ǵana saqtandyrýdy engizgen. Al Grýziia saqtandyrýmen 5 jyl jumys istep, burynǵy júiesine qaita oralǵan. Al bizde bul «100 qadamda» jazylǵan. Biz keibir jaittardy qarastyrýymyz kerek. Meniń bilýimshe, qazir jarnalar túsip jatyr. Degenmen, bul júieni qarastyrsaq, biratar suraq týyndaidy. Bizde 2,7 mln adam ózin-ózi jumyspen qamtyǵandar bolyp sanalady. Men halyqty áleýmettik qorǵaý salasyn basqarǵan barlyq ministrlerden «bul ne? álemniń qai jerinde «ózin-ózi jumyspen qamtyǵandar» degen sóz bar?» dep ylǵi suraimyn. «Ózin-ózi jumyspen qamtyǵandar» degen salyq tólemeýdiń tikelei joly. Men Úkimetke ózin-ózi jumyspen qamtyǵandar kim ekenin anyqtaýdy tapsyrǵan bolatynmyn. Bizde ózin-ózi jumyspen qamtyǵandar qandai bolý kerek, aityńyzdarshy. Olar, iaǵni 3 mln-ǵa jýyq azamat meditsinalyq saqtandyrýmen qamtylmai qalaiyn dep tur. Sonda biz basqalarǵa burynǵysha emdele ber, al olarǵa tóle deýimiz kerek. Kóshsek kósheiik, biraq qatelespeiik. Máseleni tolyq qarastyrǵannan keiin birlesken sheshim qabyldaimyz», - dedi Elbasy premer-ministr men Densaýlyq saqtaý ministrine.
Sondai-aq, Nursultan Nazarbaev «100 naqty qadam» Ult josparyn, «Rýhani jańǵyrý» baǵdarlamasyn júzege asyrýdy, salyq saiasatyn, jekemenshik bankterdiń jumysyn jetildirýdi, dári-dármek baǵasyn retteýdi tapsyrdy. Elbasy óz sózinde qazaqstandyqtarǵa zań jobalary jan-jaqty túsindirilý kerektigin de qadap aitty.
«Keide bizde túsindirý jumystary durys júrgizilmeidi. Biz halyqqa túsiniksiz uǵymdarmen jáne termindermen aityp, adamnyń túsinikti tilimen jetkizbeimiz. Bul jumysqa biliktiń barlyq tarmaqtary atsalysýy kerek», - dedi Nazarbaev.
Esterińizge sala ketsek, 2018 jyldyń 1 qańtarynan bastap saqtandyrý júiesine memleket pen ózin-ózi jumyspen qamtyǵandar qosylady. Memleket jeńildigi bar 14 sanattaǵy 10 mln azamat úshin jarna tóleidi.
Atap aitqanda, jumyssyz retinde resmi tirkelgender, zeinetkerler, kóp balaly analar, múgedekter, UOS ardagerleri, stýdentter, 18 jasqa tolmaǵan balalar, júkti áielder men 3 jasqa tolmaǵan bala kútimimen úide otyrǵan tulǵalar t.b. úshin el biýdjetinen ai saiyn 5029 teńge tólenedi. Sondai-aq, keler jyly jarna tóleitin toptyń biri – ózin-ózi jumyspen qamtyǵandar mindetti saqtandyrý júiesine ai saiyn tómengi ailyq jalaqynyń 5 paiyzyn nemese 1414 teńge tóleýi tiis. Jumyskerler jarnany 2019 jyldyń birinshi qańtarynan bastap aýdarady. Jarna mólsheri: 2019 jyly – jalaqynyń 1 paiyzyn, 2020 jyly – 2 paiyzyn quramaq. Jalpy, mindetti saqtandyrý sheńberinde meditsinalyq kómek 2018 jyldan bastap kórsetile bastaidy.
