«Elbasy Akademiiasy» KQ direktorynyń orynbasary Ánýar Janǵozin «Elbasy medali» aýqymdy jobasy týraly túsindirdi, dep habarlaidy QazAqparat.
«QR Tuńǵysh Prezidenti Nursultan Ábishuly Nazarbaev elimizdegi jastardy qoldaý maqsatynda «El Úmiti» bastamasyn usyndy. Qazirgi tańda Tuńǵysh Prezident Qory men Elbasy Akademiiasy osy bastama aiasynda jariialanǵan jobalardy júzege asyrý boiynsha belsendi jumystar jasap keledi. Búgin mine «El Úmiti» bastamasy aiasynda iske asatyn Elbasy medali aýqymdy jobasyn bastaǵaly otyrmyz. Baǵdarlamanyń negizgi simvoly - tabystyń 7 jebesin bildiredi. Osy jeti baǵyt boiynsha baǵdarlamany aiaqtaý jeke tulǵanyń jan-jaqty úilesimdi damýyna yqpal etedi.
Baǵyttardy atap ótetin bolsaq, olar - «Sport jáne dene shynyqtyrý», «Kitap oqý», «Daryn men daǵdy», «Ulttyq mura», «Eriktilik», «Týristik saiahattar» jáne «Eńbek tájiribesi». Jobanyń basty maqsaty - 14 pen 29 jas aralyǵyndaǵy qazaqstandyqtarǵa ózin jetildirýge jańa serpin berý, damý jolynda barynsha qoldaý kórsetý», - dedi Á. Janǵozin Ortalyq kommýnikatsiialar qyzmetinde.
Osy oraida ol jas ereksheligi boiynsha sai keletin, turatyn jeri men áleýmettik mártebesine qaramastan kez kelgen adam qatysa alatynyn aitty. Baǵdarlama birinshi kezekte qatysýshynyń ózin-ózi jetildirýden ótýin kózdeidi, ol degenimiz fizikalyq jaǵdaiyn jaqsartyp, daǵdysyn damyta otyryp, ainalasyndaǵy jandarǵa kómegin tigizý. Chellendj formatynda uiymdastyrylǵan baǵdarlamany iske asyrý úshin elimizdiń barlyq oblystary men qalalarynda óńirlik resýrstyq ortalyqtar men tálimgerlerdiń jelisi quryldy. Bul jobanyń árbir qatysýshysyna ádistemelik qoldaý berý maqsatynda jasalyp otyr.
«Baǵdarlamanyń artyqshylyqtaryna keletin bolsaq, birinshiden, qatysýshylarǵa beriletin tańdaý quqyǵy. Bekitilgen 7 baǵyt aiasynda kez kelgen salany tańdap, ózin jetildirý protsesin bastai berýge bolady. Ekinshiden, baǵdarlama qazirgi tańda ata-analar úshin ýaiymǵa ainalǵan balanyń bos ýaqytyn uiymdastyrý jónindegi suraqtardy kún tártibinen alyp tastaidy. Chellendjge qatysqan jastar virtýaldy álemnen tabysqa jeteleitin ortaǵa kóshedi. Mysaly, densaýlyǵyna kóbirek kóńil bólip, kitap oqyp, intellektýaldy jáne shyǵarmashylyq turǵyda damidy. Oǵan qosa jastar boiyndaǵy empatiia sezimin damytýǵa, ulttyq murany nasihattaýǵa arnalǵan baǵyttar da kezdesedi», - dep túsindirdi Janǵozin.
Sonymen qatar ol baǵdarlamaǵa qatysý tegin ekenin jetkizdi.
«Sondyqtan joba qazaqstandyqtar úshin, ásirese karantinnen sharshap júrgen jastar úshin jaqsy motivatsiiaǵa ainalady dep senemiz. Taǵy da qaitalap óteiin, baǵdarlamaǵa elimizdiń kez kelgen aimaǵynan jasóspirimder men jastar qatysa alady. Iaǵni, shalǵai eldi mekenderdi de qamtityn bolamyz. Elbasy medali baǵdarlamasynan sátti ótken jastardy patriottyq tanytqany jáne belsendi azamattyq ustanymy úshin erekshelik belgisimen nagradtaý kózdelgen. Kórsetilgen nátijeler negizinde baǵdarlama qatysýshylary altyn, kúmis jáne qola medaldarmen marapattalady. Ár deńgeide qoiylatyn talaptar bar. Qola deńgeige jetý úshin 6 ai, kúmiske 12 ai jáne altyn deńgeige jetý úshin 18 ai qajet», - dedi Ánýar Janǵozin.
Belgili bolǵandai, baǵdarlamaǵa qatysý úshin me.fpp.kz saitynda aldymyzdaǵy eki aptanyń ishinde tirkelý qajet. Búginde qyzyǵýshylyq tanytyp, aldyn ala tirkeýden ótken qatysýshylar sany 6 myńnan asyp otyr.
.jpeg)