Qazaqstannyń Tuńǵysh Prezidenti – Elbasy Nursultan Nazarbaevtyń «Birlese bilgen el bárin jeńedi» atty maqalasy 30 jyl qalyptasqan dástúrdiń jalǵasy. Mundai pikirdi Májilis depýtaty Beibit Mamraev bildirdi, dep habarlaidy QazAqparat tilshisi.
«Birinshiden, bul maqalany 30 jyl boiy qalyptasqan dástúrdiń jalǵasy retinde qabyldaimyn. Sebebi Elbasy kez kelgen qiyn jaǵdaida álemde oryn alyp otyrǵan ahýaldy qosa taldai otyryp elimen suhbattasatyn dástúri bar. Ekinshiden, Elbasynyń mundai dástúri barlyq ýaqytta da elge úmit beredi. Úshinshiden, memleket biligindegi institýttarda, Úkimet bolsyn, Parlament bolsyn, ortalyq organdar men jergilikti bilikte bolsyn mundai qiyndyqty júieli jumyspen ǵana eńseretin tetik qalyptasqan. Mundai tetik bolmaǵanda talai qiyndyqqa tap bolar edik. Sondyqtan Elbasynyń óz oiymen bólisý arqyly jurtshylyqty sabyrlylyqqa shaqyrýy óte túsinikti bolyp shyqty», - dedi Májilis depýtaty.
Onyń atap ótýinshe, Elbasy maqalasyndaǵy eń basty túiin memlekettiń negizgi maqsaty adamdy jáne onyń densaýlyǵyn saqtaý ekendigine basa nazar aýdarý boldy.
«Elbasynyń Ulttyq qorymyzda 90 mlrd dollar qarajatymyz bar deýi de erteńge kúnge senimimizdi kúsheite túsedi. Bul qor únemi tolyqtyrylyp otyrady. Sondyqtan memleket moinyna alǵan áleýmettik saiasatty júzege asyra beredi. Iaǵni, zeinetaqy, shákirtaqy, járdemaqy, qazirgi ýaqytta myna álemdi jailaǵan indetke bailanysty muqtaj azamattarǵa beriletin 42 500 teńge mólsherinde tólem ýaqtyly beriledi. Oǵan esh kúmán bolmaýy tiis», - dedi Beibit Mamraev.
