Premer-ministrdiń orynbasary - qarjy ministri Erulan Jamaýbaev "Qazaqstannyń Tuńǵysh Prezidenti – Elbasy týraly" konstitýtsiialyq zańnyń kúshi joiylǵan jaǵdaida onyń keńsesin qarjylandyrýǵa qatysty suraqqa jaýap berdi, dep habarlaidy Sputnik Qazaqstan.
Ministrdiń aitýynsha, "Qazaqstannyń Tuńǵysh Prezidenti – Elbasy týraly" konstitýtsiialyq zańnan bólek "Prezident týraly" konstitýtsiialyq zań bar. Sol jerde burynǵy prezidentterdi qarjylandyrý máselesi de qarastyrylǵan.
"Birneshe konstitýtsiialyq zań bar ǵoi. Jalpy, "prezident" jáne "burynǵy prezident" degen bar. Olardyń barlyǵy memlekettik biýdjetten qarjylandyrylady. Bul tek Qazaqstannyń tájiribesi ǵana emes, dúniejúzinde solai – prezident kezinde onyń jumysyn qamtamasyz etýge qarajat bóledi, sosyn prezidenttikten ketedi ǵoi, eks-prezident bolǵan kezde júrip-turýyna qarjy qarastyrylady", - dedi Jamaýbaev.
Ministrdiń sózine qaraǵanda, eks-prezidentke qatysty zańnamaǵa ózgeris engizilse, qarajat bólinbeidi. Al "Qazaqstannyń Tuńǵysh Prezidenti – Elbasy týraly" konstitýtsiialyq zań oǵan áser etpeidi.
"Eger "eks-prezidentter memlekettik biýdjetten qarjylandyrylmaidy" dese, onda, árine, alyp tastaimyz. Biraq qazir ondai suraq týyndap turǵan joq", - dep atap kórsetti Jamaýbaev.
Aita keteri, buǵan deiin "Ashyq NQA" portalynda "2022 – 2024 jyldarǵa arnalǵan respýblikalyq biýdjet týraly" zańǵa ózgerister men tolyqtyrýlar engizýdiń jobasy jariialanǵan bolatyn.
Osy qujatta Qazaqstannyń Tuńǵysh Prezidenti – Elbasynyń qyzmetin qamtamasyz etýge 1,2 milliard, al Tuńǵysh Prezident kitaphanasyna 1,3 milliard teńge bólý qarastyrylǵan. Búgin Senat zańdy qabyldap, Prezidenttiń qol qoiýyna jiberdi.
