Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń qazaqstandyqtardy 1 mamyr – Qazaqstan halqynyń birligi kúnimen quttyqtady, dep habarlaidy "Ult aqparat" elbasy.kz saityna silteme jasap.
***
Qurmetti otandastar!
Barshańyzdy Qazaqstan halqynyń birligi kúnimen shyn júrekten quttyqtaimyn!
Bul meiram ulttyq bolmysymyzdy aiqyndaityn asyl qasietterimiz – dostyqty, senimdi jáne patriotizmdi dáripteidi.
Men shirek ǵasyr buryn osy merekeni belgileý týraly sheshim qabyldaǵan edim. Ótken jyldar ishinde biz elimizdiń kópultty jáne kópkonfessiialy qurylymyn strategiialyq artyqshylyǵymyzǵa ainaldyra aldyq.
Qazaqstan bereke-birliktiń arqasynda túrli qiyndyqty eńserip, búkil álemniń qurmetine bólendi jáne memleket qurý isinde zor jetistikke jetti.
Beibitshilik pen qoǵamdyq kelisim árdaiym eldigimizdi bekemdeitin qasterli qundylyǵymyz bolyp qala beredi.
Biz biyl Qazaqstan halqy assambleiasynyń 25 jyldyǵyn atap ótemiz. Bul – barlyq etnos ókilderin memleket qurýshy ulttyń tóńiregine toptastyratyn jáne táýelsizdigimizdi nyǵaitýǵa yqpal etetin biregei institýt.
Halqymyzdyń yrys-yntymaǵy tarih pen taǵdyr syiy ǵana emes, árqaisymyzdyń eren eńbegimiz ben zor jaýapkershiligimizdiń nátijesi.
Birlik kúni biyl ádetten tys jaǵdaiǵa tuspa-tus kelip otyr. Búkil álemdi jailaǵan indet bizdiń elimizdi de ábigerge saldy.
Bul synaqtan da súrinbei ótip, kúsh-qýatymyzdy odan ári arttyra túsemiz dep senemin. Osy jolda dostyq, birlik, kelisim jáne ózara qoldaý qaǵidattaryn berik ustanǵanymyz abzal.
Barshańyzǵa myqty densaýlyq pen baq-bereke, elimizge tatýlyq pen tolaǵai tabys tileimin!
.jpeg)