- Búgin elordada ótip jatqan Qazaqstan Táýelsizdiginiń 25 jyldyq mereitoiyna arnalǵan saltanatty jiynda Elbasy Nursultan Nazarbaev egemendik jyldaryndaǵy qazaq tiliniń jaǵdaiyna baǵa berdi, dep habarlaidy Ult.kz tilshisi QazAqparat agenttigine silteme jasap.
"Biz qasietti qazaq tili men ulttyq mádenietimizdiń jahandyq gýmanitarlyq keńistikke erkin enýin qamtamasyz ettik. Ózderińiz kórip, estidińizder, qazaqtyń tili Birikken Ulttar Uiymy Bas Assambleiasynyń tórinen estildi. Ol ǵaryshtan da estildi, búginde internettiń de tili. Otandyq aqparat quraldarynyń basym kópshiligi qazaqsha shyǵady. Esterińizde bolsa, bir kezde, Táýelsizdikke deiin Almatyda bir ǵana qazaq mektebi bar edi. Ótken 25 jylda elimizde qazaq tilinde bilim beretin 1 myńnan astam mektep ashyldy", - dep atap ótti Elbasy.
Osy oraida Memleket basshysy qazaqtyń tili AQSh, Ulybritaniia, Germaniia, Qytai, Ońtústik Koreia, Majarstan, Polsha, Ázerbaijan, Armeniia siiaqty elderdiń beldi ýniversitetterinde oqytylyp júrgendigin jetkizdi.
"Aita keteiin, búgingi tańda mektep oqýshylarynyń úshten ekisinen astamy, stýdentterdiń 60 paiyzǵa jýyǵy memlekettik tilde bilim alyp jatyr. Elimiz boiynsha qazaq tilin oqytatyn 350 ortalyq tabysty jumys isteýde",-dedi Prezident.
Eske sala keteiik, 2015 jyldyń 29 qyrkúieginde BUU BA-nyń 70-shi mereitoilyq sessiiasynda N.Nazarbaev atalmysh Uiymnyń minberinen qazaq tilinde baiandama jasady. Memleket basshysy kún tártibindegi meilinshe ózekti halyqaralyq máseleler boiynsha Qazaqstannyń ustanymyn jáne olardy sheshý joldaryn baiandady. Elbasy HXI ǵasyrda adamzattyń eń basty mindeti álemdi soǵys qaterinen múlde aryltatyn jáne onyń sebepterin joiatyn strategiiany júzege asyrý bolýǵa tiis ekenine nazar aýdardy. Sol úshin Qazaqstan Prezidenti Birikken Ulttar Uiymynyń júz jyldyǵyna Jahandyq Strategiialyq Bastama - 2045 josparyn ázirleýdi usyndy.
