Búgin Aqordada ótken Úkimettiń keńeitilgen otyrysynda Memleket basshysy Nursultan Nazarbaev jeke turǵyn úi qurylysyna arnalǵan jańa «Nurly jer» baǵdarlamasyn ázirleýge tapsyrma berdi. Sonyń aiasynda Prezident qalalardyń mańaiyndaǵy jerlerdi memleket menshigine qaitaryp, xalyqqa 10 sotyq jer retinde berý qajettigin jetkizdi, dep xabarlaidy "Ult aqparat" Baq.kz portalyna silteme jasap.
«Ákimder aýyl sharýashylyǵy ministrligimen birlese otyryp, qazirgi jer qoryn tolyǵymen túgendep shyǵýy tiis. Osydan keiin qalalardyń bas josparyn ózgertý boiynsha tiisti usynystarly engizý kerek. Ákimderge jerdi memleket menshigine, sonyń ishinde, jeke turǵyn úige qajetti jerlerdi satyp alý quqyǵyn bergen durys. Iá, qalanyń ishinde jer joq. Bar bolsa, berińder. Oǵan injenerlik jelilerdi de tartý ońai. Al qalanyń syrtyndaǵy jerler kim kóringenniń qolynda ketti. Endi, shalqaiyp jatyr. Ákimder ony alyp qoia almaidy. Aitpaqshy, qazir, kóbinese, Astana, Almaty, Shymkent siiaqty qalalarda 10 jerge suranys joǵary. Sondyqtan ákimder bos jatqan jerlerdi zańdy túrde alýy qajet. Eger jerdi zańǵa sáikes igermei jatsa, prokýrorlarmen birge baryp, alyp qoiý qajet. Bolmasa, ózderi satyp alǵan kadastrlyq baǵasymen qaitarǵan jón. Osyny aldyn ala eskertip otyrmyz, jerdi aldyndar ma, ferma salamyz dedińder me, úi salamyz dep aittyńdar, endi soǵan jaýap beretin kez keldi. Bul máseleni uzaqqa sozýǵa bolmaidy. Mine, sol kezde adamdar 10 sotyq jerlerin alyp, jeke úilerin sala alady. Buny qolǵa alsaq, qurylys salasy jandana túsedi. Qurylys materialdaryna suranys kóteriledi. Adamnyń ózi úii bolǵanǵa ne jetsin! Erteń ol úi balasyna qalady, nemeresine qalady», - dep atap kórsetti N.Nazarbaev.
Aita keteiik, 10 sotyq jer berý máselesi Jer komissiiasynyń otyrystarynda kóterilgen bolatyn. Sol kezde komissiia basshysy Asqar Myrzaxmetov: «Búginde ákimder qalanyń syrtyndaǵy jeke menshik jerlerdi memleket menshigine qaitara almaidy. Zań boiynsha ol jerde mektep, aýrýxana, ia bolmasa, balabaqsha siiaqty áleýmettik nysandar salynsa ǵana ony memleket menshigine qaitarýǵa ruqsat bar», - dep aitqan bolatyn.
Demek, Prezidenttiń búgingi bastamasyn iske asyrý úshin zańnamaǵa ózgeris engizip, ákimderge bos jatqan jerlerdi 10 sotyq jer úshin memleket menshigine qaitarý múmkindigin berýge bolady.
.jpeg)