Nursultan Nazarbaev jastar qanatynyń múshelerin «Jas Otan»-nyń 20 jyldyq mereitoiymen jáne kele jatqan Táýelsizdik kúni merekesimen quttyqtady, dep habarlaidy "Ult aqparat" Elbasynyń resmi saityna silteme jasap.
Nursultan Nazarbaev táýelsizdik jyldary qol jetkizgen negizgi jetistikterge toqtalyp, osy jolda úlken jumys atqarylǵanyn atap ótti.
– Men búgingi tańda kúlli qazaqstandyqtar maqtan tutatyn tabystarymyzǵa jetý qanshalyqty qiyn bolǵanyn jaqsy bilemin. Óskeleń urpaq qolda bardy qadirleýge, Otanymyzdyń ári qarai órkendeýin oilastyrýǵa, óz elin maqtanysh etýge tiis. Jastar múddesi árdaiym meniń basty nazarymda, – dedi «Nur Otan» partiiasynyń Tóraǵasy.
Qazaqstannyń Tuńǵysh Prezidenti egemendik jyldary elimizde naqty ári tiimdi áleýmettik liftter qurylǵanyn aitty.
– Meniń bastamammen el úshin eń kúrdeli kezeńde iske qosylǵan «Bolashaq» baǵdarlamasymen 15 myńǵa jýyq jas qazaqstandyq bilim aldy. Bes jyl buryn Nazarbaev Ýniversiteti stýdentteriniń alǵashqy legi túlep ushty. Osy jyldardyń ishinde oqý ornynda bes myńǵa jýyq maman daiarlandy. Memleket iske qosqan áleýmettik liftterdiń arqasynda myńdaǵan jas qazaqstandyq tabysqa jetti, – dedi Nursultan Nazarbaev.
«Nur Otan» partiiasynyń Tóraǵasy jastar qanatynyń múshelerine pandemiia kezindegi qaiyrymdylyq sharalaryna jáne volonterlik qyzmetke belsene atsalysqany úshin zor rizashylyǵyn bildirdi.
Qazaqstannyń Tuńǵysh Prezidenti jastar belsendiligi árdaiym saiasi progrestiń qozǵaýshy kúshteriniń biri bolǵanyna nazar aýdardy.
– Qazirgi kezde jigerli ári bastamashyl bolýdyń mańyzy erekshe. Óitkeni biz tez ózgerip jatqan álemde ómir súrip otyrmyz. Kópshilikke tanys ómir salty artta qalǵany sózsiz. Tehnologiialar múmkindikterimizdiń áleýetin aitarlyqtai arttyrýda, – dedi Nursultan Nazarbaev.
Elbasy eldi damytý jáne Qazaqstannyń táýelsizdigin nyǵaitý isine jastardyń belsene atsalysýynyń mańyzyn atap ótti.
– El erteńi men ult taǵdyry jastarǵa tikelei bailanysty. Qazirgi urpaq zaman talabyna sai damyp otyrýy kerek. Búgin aitylǵandardyń bárin meniń ósietim dep túsinińder, – dedi Qazaqstannyń Tuńǵysh Prezidenti.
.jpeg)