Qaýipsizdik Keńesiniń Tóraǵasy Nursultan Nazarbaev Áset Isekeshev pen Nurlan Ermekbaevty qabyldady. Bul týraly elbasy.kz saity habarlady.
Kezdesýde biyl 19 mamyrda ótetin Qaýipsizdik Keńesi otyrysynyń kún tártibi jáne jiynda qarastyrý josparlanǵan qujattar talqylandy.
«Apparat Qaýipsizdik Keńesiniń kezekti otyrysyna materialdardy daiyndady. Otyrysta eki másele qaralady. Birinshisi – Qarýly Kúshterdi qurý jáne damytý tujyrymdamasy týraly, ekinshisi – shekaradaǵy qaýipsizdikti qamtamasyz etý jóninde. Birinshi másele boiynsha Qorǵanys ministrligimen birlese otyryp, negizgi basym baǵyttar men iske asyrý kezeńderi anyqtaldy. Sondai-aq Úkimetpen birge qarjylandyrý jáne Tujyrymdamany iske asyrýǵa qorǵanys ónerkásibi keshenindegi kásiporyndardyń qatysýy máseleleri qaraldy», – dedi Á.Isekeshev.
Óz kezeginde Qorǵanys ministri jańa Tujyrymdama jobasynda kórinis tapqan armiiany qurýdyń negizgi baǵyttary týraly tolyq aqparat usyndy.
Sońynda Nursultan Nazarbaev Qaýipsizdik Keńesiniń Apparatyna birqatar naqty tapsyrma berdi.
