Nursultan Nazarbaev «Nur Otan» partiiasy Tóraǵasynyń birinshi orynbasary Baýyrjan Baibekti qabyldady, dep habarlaidy Elbasynyń resmi saity.
Kezdesý barysynda Elbasy partiianyń ishki irikteýi – praimerizdiń sapaly ótýiniń erekshe mańyzdylyǵyna toqtaldy.
– Praimerizdiń sapaly ótýin qamtamasyz etý jáne halyqqa onyń maqsattary týraly túsindirý mańyzdy. Bul Májilis pen máslihattar sailaýyna qatysý úshin partiianyń belsendi, saýatty jáne patriot múshelerin irikteýge múmkindik beredi, – dedi «Nur Otan» partiiasynyń Tóraǵasy.
Baýyrjan Baibek Nursultan Nazarbaevqa partiia músheleri arasyndaǵy irikteýdi uiymdastyrý boiynsha daiyndyq jumystarynyń nátijeleri týraly aityp berdi.
– Búgin elimizdiń barlyq óńirinde praimeriz bastaldy. Oǵan qatysý úshin jergilikti jerlerde 700-den astam qoǵam belsendisi partiia qataryna qosyldy, – dedi «Nur Otan» partiiasy Tóraǵasynyń birinshi orynbasary.
Sonymen qatar B.Baibek «Nur Otan» partiiasynyń Tóraǵasyna sailaýaldy baǵdarlamany daiyndaý jáne «Birgemiz» qorynyń áleýmettik az qamtylǵan azamattar men meditsinalyq uiymdardyń qyzmetkerlerin qoldaýǵa baǵyttalǵan jumysy týraly baiandady. Sondai-aq Elbasyna sý tasqynynan zardap shekken Túrkistan oblysy Maqtaaral aýdanyndaǵy Dostyq aýylynyń turǵyndaryna arnalǵan úilerdi salý boiynsha atqarylǵan jumystardyń nátijeleri týraly aqparat berildi.
– «Nur Otan» partiiasyna keletin onlain ótinishter sany bes ese artty. Osylaisha, jeti ai ishinde 270 myń adam ótinish bildirdi. Olardyń 60 paiyzy qaralyp, sheshimin tapty. Ózińiz bastamashy bolǵan «Birgemiz» qorynyń aiasynda 2,3 million qazaqstandyqqa qoldaý kórsetildi. Maqtaaral aýdanyndaǵy sý tasqynynan zardap shekken aýyl turǵyndaryna arnalǵan 20 úidiń qurylysy aiaqtalýǵa jaqyn, – dedi «Nur Otan» partiiasy Tóraǵasynyń birinshi orynbasary.
