Elbasynyń baspasóz qyzmetiniń Yoytube arnasynda Nursultan Nazarbaevtyń «Shtrihi k portretý» derekti filminiń úshinshi bólimi jariialandy, dep habarlaidy QazAqparat.
Nursultan Nazarbaev filmdegi suhbatynda úlken saiasattan góri bul joly jeke ómiri men jeke kózqarasy jaily kóbirek syr shertti. Jieni Aisultan Nazarbaevtyń ólimine qatysty pikir bildirip, Astananyń Nur-Sultan dep atalýyna qatysty oiyn aitty. Sonymen qatar Elbasy adamdardyń boiyndaǵy qandai qasietterdi baǵalaitynyn jetkizdi.
«Prezident laýazymynda bolǵan kezimde men mundaiǵa múlde qarsy boldym, tyiym salyp otyrdym. Táýelsizdik merekesi nemese meniń týǵan kúnim kelgen saiyn meniń esimimmen qandai da bir kósheni nemese mektepti ataý týraly usynystar túsip jatatyn. Biraq oilap qarasańyz, ózim oqyǵan Abai atyndaǵy mektepke óz atyńdy berýge kelisý degen múlde durys emes qoi!? Men ondaiǵa tyiym salyp otyrdym. Ony bilesizder. Kelisimimdi bergen birden-bir jaǵdai – ol ýniversitet», - degen Nursultan Nazarbaev elordada irgeli joǵary oqý ornyn ashý ideiasynyń avtory ózi ekenin eske saldy.
Elbasynyń aitýynsha basqa jaǵdailardyń bári de óz maquldaýynsyz atalyp jatyr.
«Táýelsizdikke 25 jyl tolǵan kezde de Parlament elordany Nur-Sultan dep ataý týraly bastama kótergen bolatyn. Buryn qala Aqmola dep atalǵan. Astanany halyqaralyq deńgeide tanystyrý mindeti tur edi. Qonaqtardy shaqyrdyq. Aqmola dep ataý týrasynda da ártúrli pikir bolǵandyqtan, oiyma elordany Astana dep ataý týraly ideia keldi. Bul – jańashyldyq emes. Mysaly Beijiń degen sóz de Soltústik Astana degendi bildiredi. Sondai mysal kóp. Astana degen ataý jaqsy sińisip, adamdar da, álem de úirendi», - dedi ol.
Nursultan Nazarbaev elordanyń ataýyn ózgertý bastamasyn qazirgi Prezident Qasym-Jomart Toqaevtyń kótergenin eske saldy.
«Az degende Nur-Astana, kóp degende Nur-Sultan dep ataý usynyldy. Kezinde sol jaǵalaýǵa qarap otyrǵanda kóz aldymda alyp dala jatatyn. Eshteńe joq edi. Qazirgi EKSPO turǵan jerde kartop pen oramjapyraq ósetin edi. Al qazir ol qandai ǵajaiyp qalaǵa ainaldy. Suhbat berip otyrǵan sátti paidalanyp, taǵy da basshylardan, qazaqstandyqtardan suraitynym, ondaiǵa áýestenýdiń qajeti joq. Munyń túk keregi joq. Tiri kezinde eskertkish ornatý degen sóz – ólgennen keiin urpaq seni esinde saqtap qalatynyna senbeý der edim. Sondyqtan mundaiǵa áýestenýdiń qajeti joq dep ótinemin. Kerisinshe biz qazir tarihi ataýlardy qaitaryp jatyrmyz», - dedi Elbasy.
Derekti filmniń sońǵy nusqasyn myna siltemeden kórýge bolady.
