Elbasy Premer-Ministr Asqar Mamin men Premer-Ministrdiń birinshi orynbasary Álihan Smaiylovty qabyldady, dep habarlaidy "Ult aqparat" elbasy.kz silteme jasap.
Kezdesýde «Nur Otan» partiiasynyń Tóraǵasyna «Ózgerister joly: Ár azamatqa laiyqty ómir!» sailaýaldy baǵdarlamasyn iske asyrýǵa baǵyttalǵan Jol kartasy aiasynda atqarylyp jatqan jumystar týraly aqparat usynyldy.
Partiianyń Saiasi keńesi Biýrosynyń múshesi, Premer-Ministr A.Mamin Sailaýaldy baǵdarlama elimizde júzege asyrylyp jatqan reformalardyń jalǵasy ekenin aitty. Ol partiianyń aldyna aýqymdy ári naqty maqsattar qoiǵanyn, ony baǵyndyrýǵa qajetti barlyq resýrs jetkilikti ekenin atap ótti.
Sondai-aq Qazaqstannyń Tuńǵysh Prezidentine 2021 jyldyń birinshi toqsanyndaǵy áleýmettik-ekonomikalyq damý qorytyndysy, Úkimettiń jahandyq daǵdarys jaǵdaiynda ulttyq ekonomikanyń ósý qarqynyn saqtaý jumystary týraly baiandaldy.
Alǵashqy toqsannyń qorytyndysy boiynsha ekonomikanyń negizgi salalaryndaǵy kórsetkishter birtindep jaqsara bastaǵany aityldy.
Máselen, óńdeý ónerkásibinde (+7,5 paiyz), qurylys (+13,1 paiyz) pen aýyl sharýashylyǵynda (+2,8 paiyz) ósim bar ekeni atap ótildi. Sondai-aq mashina jasaý (+21,8 paiyz), farmatsevtika (+9,1 paiyz), himiia ónerkásibi (+14,2 paiyz), metallýrgiia (+2,3 paiyz), jeńil ónerkásip (+3,1 paiyz) pen otandyq ekonomikanyń basqa da birqatar salalarynda ósýdiń oń qarqyny baiqalýda. Taý-ken metallýrgiia sektoryn qospaǵanda, negizgi kapitalǵa salynǵan investitsiialar kólemi 34 paiyzǵa artty.
Osynyń bári IJÓ-niń boljanǵan naqty ósimin 2021 jyl qorytyndysy boiynsha 2,8 paiyzdan 3,1 paiyzǵa deiin arttyrýǵa múmkindik berdi. Infliatsiia 4-6 paiyz aralyǵynda bolady dep boljanyp otyr
Sondai-aq Úkimet basshysy naqtylanǵan respýblikalyq biýdjet jobasy týraly baiandady. Onyń shyǵystary «Nur Otan» partiiasynyń 2021-2025 jyldarǵa arnalǵan sailaýaldy baǵdarlamasyn, Elbasynyń strategiialyq bastamalaryn jáne Memleket Basshysynyń Joldaýyn iske asyrýdy qamtamasyz etýge baǵyttalǵan.
Sonymen qatar qarjylandyrý COVID-19 indetine qarsy aýqymdy kúres is-sharalaryn júzege asyrýǵa, densaýlyq saqtaý júiesin jańǵyrtýǵa, memlekettiń jurtshylyq aldyndaǵy áleýmettik mindettemelerin oryndaýǵa, sondai-aq negizgi memlekettik baǵdarlamalardy iske asyrýǵa baǵyttalady.
Elbasy el ekonomikasyndaǵy kórsetkishterdi jaqsartý úshin júieli jumys atqarýdyń mańyzdylyǵyna toqtaldy.
– Ekonomikanyń negizgi kórsetkishteri qalpyna kelip jatqanyn kórip otyrmyz. Bul jaqsy úrdis. Mashina jasaýda ósim shamamen 22 paiyzdy qurady. Jeńil ónerkásip te qarqyndy damyp keledi. Jalpy óńdeý ónerkásibi, qurylys sektory, agroónerkásiptik keshen men basqa da birqatar salalarda ósim bar, – dedi Qazaqstannyń Tuńǵysh Prezidenti.
Áńgime barysynda sanitarlyq-epidemiologiialyq ahýaldy turaqtandyrý jáne vaktsina saldyrǵan azamattardyń sanyn kóbeitýge baǵyttalǵan jumystar jaily aityldy.
Elbasy jurtshylyq arasynda vaktsina salýdyń mán-mańyzy týraly aqparattyq-túsindirý jumystaryn júrgizýdiń mańyzdylyǵyn atap ótti.
– Densaýlyqty kútý kerek. Betperde taǵyp, qoldy jii jýyp júrgen jón, kópshilik sharalarǵa barmaý, mindetti túrde ekpe saldyrý óte mańyzdy. Sonda ǵana osy kúrdeli kezeńnen óte alamyz, – dedi Nursultan Nazarbaev.
