Qyzylorda oblysynyń ákimi Qyrymbek Kósherbaev QR Tuńǵysh Prezidentiniń júldesine arnalǵan qazaq kúresinen VII «Qazaqstan barysy» týrniriniń jeńimpazy Elaman Erǵalievpen kezdesti, dep habarlaidy oblystyq ákimdiktiń baspasóz qyzmeti.
«Tól sportymyzdy túletý bizdiń oblysymyzdan bastaý alǵany - biz úshin úlken abyroi. 2011 jyly alǵashqy «Qazaqstan barysy» titýlyn ielengen Ulan Rysqul bolsa, Rýslan Ábdirazaqov kúmis jáne qola júldelerdi ielendi. Olardyń jeńisti jolyn 22 jastaǵy batyrymyz Elaman Erǵaliev jalǵastyryp otyr. Osy sportshylardyń biik belesterdi baǵyndyryp, jetistikterge jetýine úles qosqan jattyqtyrýshysy Sadyq Mustafaevtyń jáne Ádilbek Serikbaevtyń da eńbegi zor dep atap ótkim keledi», - dedi oblys ákimi.
Oblys ákimi Qyrymbek Kósherbaev «Qazaqstan barysy» jeńimpazyna eki bólmeli páterdiń sertifikatyn tabystady.
Óz kezeginde Elaman Erǵaliev oblys ákimine qoldaý kórsetkeni úshin úshin alǵysyn bildirip, bolashaqtaǵy josparlarymen bólisti. Onyń maqsaty - olimpiada medalin jeńip alý.
«Boz kilemdegi beldesýde oiymda tek týǵan jerim men jerlesterime jeńis syilaý turdy», - dedi Elaman Erǵaliev.
Esterińizge sala keteiik, QR Prezidenti - Elbasy Nursultan Nazarbaevtyń júldesine arnalǵan qazaq kúresinen VII «Qazaqstan barysy» týrnirine barlyǵy 34 sportshy qatysty. Aitýly dodada sáýir aiynda áskeriler arasynda ótken «Ásker barysy» jarysynda jeńimpaz atanǵan Elaman Erǵaliev top jardy.
Aita keteiik, Elaman Erǵaliev 1995 jyly 25 mamyrda Qyzylorda oblysy Qarmaqshy aýdanynda dúniege kelgen. Dziýdomen 9 jasynan bastap ainalysady. QR Sport sheberi, dziýdo jáne qazaq kúresi boiynsha birneshe márte jeńimpaz atanǵan, dziýdodan jastar arasynda Aziia chempionatynyń kúmis júldegeri (Qytai, Hainan q. 2013 j.), dziýdodan IV Islam yntymaqtastyǵy oiyndarynyń qola júldegeri (Ázerbaijan, Baký q. 2017 j.).
