M.Áýezov atyndaǵy OQMÝ-da qazaqtyń ataqty batyry, daryndy qolbasshy Qarasai Altynaiuly batyrdyń týǵanyna 420 jyl tolýyna orai «El batyrlary – ulttyń rýhy: tanym men taǵlym» atty taqyrypta halyqaralyq ǵylymi konferentsiia ótti.
Onda Túrkistan oblysy ákiminiń orynbasary Málik Otarbaev oblys ákiminiń quttyqtaýyn jetkizip, halyqaralyq deńgeide ótkizilip otyrǵan sharanyń mańyzdylyǵyna toqtaldy. M.Áýezov atyndaǵy OQMÝ-dyń professory, «Báidibek baba» respýblikalyq qorynyń prezidenti Naǵashybek Qapalbekuly «Aq Orda» respýblikalyq qoǵamdyq qozǵalysynyń tóraǵasy Qairat Satybaldy, Parlament Senatynyń depýtaty Talǵat Musabaev syndy birqatar el azamattarynyń quttyqtaý hatyn oqyp, konferentsiia jumysyna sáttilik tiledi. Oqý ornyna syi-siiapat tabystap, ýniversitet rektory Dariia Qojamjarovany halyqaralyq «Jambyl» qorynyń tósbelgisimen marapattady. Ózbekstan Respýblikasynan kelgen birqatar ǵalymdarǵa alǵys aityp, qazaqy dástúrmen shapan japty.
Qazaq handyǵynyń qalyptasyp, nyǵaiýy úshin týǵan elin, jerin basqynshylardan qorǵaǵandardyń qatarynda Qarasai Altynaiuly da bar. Ol – Jetisýda jońǵar shapqynshylyǵyna qarsy soǵysta qol bastaǵan batyr. Almaty oblysy Jambyl aýdanyna qarasty Sýyqtóbe taýynyń eteginde ornalasqan Qarasaz degen jerde ómirge kelip, Arqa jerinde Kókshetaý úshin bolǵan shaiqasta aýyr jaralanyp, dúnie salǵan. Ál-Farabi atyndaǵy Qazaq Ulttyq ýniversitetiniń Qazaqstan tarihy kafedrasynyń meńgerýshisi, tarih ǵylymdarynyń doktory, professor, QR Ulttyq Ǵylym Akademiiasynyń múshesi Bereket Káribaev óz baiandamasynda Qarasai batyrdyń ómirbaianyn ǵana emes, onyń qazaq tarihynda alatyn orny jaily da sóz etti.
Jalpy, konferentsiiaǵa 51 maqala kelip túsken eken. Plenarlyq jáne sektsiialyq májilisterde 43 baiandama tyńdalyp, talqylandy. Oǵan sheteldik jáne otandyq ǵalymdar, qoǵam qairatkerleri, elimizdegi ǵylymi-zertteý institýttary men ǵylymi ortalyqtardyń mamandary qatysty. Shara barysynda qonaqtar «Muhtartaný», «Elbasytaný» ǵylymi- ádistemelik ortalyqtarymen tanysyp, «Suranshy batyr» tarihi tulǵalardy zertteý ortalyǵy men Shymkenttegi «Otyrar» ǵylymi-ámbebap kitaphana qyzmetkerleri uiymdastyrǵan kitap kórmesin tamashalady.
Aita keteiik, konferentsiiany uiymdastyrýǵa Astana qalasyndaǵy
«Aq Orda» respýblikalyq qoǵamdyq qozǵalysy jáne Almaty qalasyndaǵy «Báidibek baba» respýblikalyq qory atsalysty.
Dilara Bimenova
