Qazaqstan aýmaǵynan benzindi, dizel otyny men munai ónimderiniń jekelegen túrlerin avtomobilmen áketýge salynǵan 6 ailyq tyiym taǵy jarty jylǵa uzartylýy múmkin, dep habarlaidy QazAqparat.
Bul týraly Úkimet otyrysynda Energetika ministri Maǵzum Myrzaǵaliev málim etti.
«Biylǵy 8 aidyń qorytyndysy boiynsha 8,3 mln tonnadan astam munai ónimderi óndirildi. Bul kórsetkish jospardan asyp tur. Iaǵni, 102 paiyzǵa teń. Atap aitsaq, atvobenzin 4 paiyzǵa artyq. Dizel otyny osy jylǵy jospardyń 98 paiyzyna teń. Ishki naryqty dizel otynymen turaqty qamtamasyz etý úshin Pavlodar munai-himiia zaýytyndaǵy jóndeý jumystarynyń merzimin aýystyrý nemese qysqartý máselesi qazir pysyqtalýda. Buǵan qosa benzindi, dizel otyny men munai ónimderiniń jekelegen túrlerin Qazaqstan aýmaǵynan avtomobilmen áketýge 6 ai merzimge tyiym salýdy kózdeitin buiryqty taǵy jarty jylǵa sozý máselesi pysyqtalýda», - dedi ministr.
Sondai-aq, ol gaz eksportynyń tómendeýine sebep bolǵan jaittarǵa toqtaldy.
«Eki basty sebep bar. Ol – ishki qajettilikterdiń ósýi jáne iri jer qoinaýyn paidalanýshylar tarapynan óndirilgen taýarlyq gaz kóleminiń azaiýy», - dedi Maǵzum Myrzaǵaliev.
